Compostela, 17 de novembro do 2022 – O Mercado da Estrela chegará a súa edición número once entre os vindeiros 16 e 18 de decembro.
Os espazos que acollerán o Mercado da Estrela serán San Martiño Pinario e o 2º andar do Centro Obra Social Abanca na praza de Cervantes. Obradoiros e gardería complementan a oferta de este mercado creativo que promove principalmente o produto artesanal galego. A programación completarase coa oferta musical e gastronómica na praza 8 de marzo e na pista cuberta do Centro Don Bosco.
A programación foi presentada polo concelleiro de Festas, Gonzalo Muíños, a directora do evento, Mónica Mejías, e a xerente da Fundación de Artesanía de Galicia, Elena Fabeiro. O Mercado da Estrela conta co patrocinio do Concello de Santiago, Turismo de Santiago, a Dirección xeral de Comercio e Consumo apoiando á marca Artesanía de Galicia, Estrella Galicia e Gadis, así como coa colaboración do Seminario Maior, a “Hospedería San Martín Pinario”, Abanca e o Centro Don Bosco como localizacións anfitrionas do evento.
Durante a rolda de prensa, o concelleiro de Festas, Gonzalo Muíños, recordou a importancia deste evento para o Nadal compostelán xa que “ademais dunha actividade moi atractiva para a cidadanía, tamén defende e promove o comercio de proximidade, a creatividade local e a cultura feita en Galicia”. O edil tamén aproveitou para convidar a veciñas e veciños de todas as idades e tamén a visitantes de fóra de Santiago a “achegarse esa fin de semana e mercar os agasallos de Nadal para familia e amizades”.
Un centenar de marcas de artesanía, moda, ilustración, xoguetes, fotografía, deseño, decoración, edición, produtos enogastronómicos e últimas tendencias participarán durante a fin de semana previa a Nadal. Unha oferta que incluirá foodtrucks, postos de restauración e un atractivo programa de concertos e sesións picadiscos como a do DJ Pretty Pretty 2000 o venres, o Bingo de Nadal o sábado, o concerto de Rastreadores o domingo e o xa tradicional Fotomatón Estreleiro.
Unha programación á que se irán engadindo contidos que serán desvelados pouco a pouco a medida que se acheguen os días sinalados.
