Compostela, 13 de febreiro do 2023 – A convocatoria de SOS Sanidade pública encheu este domingo as rúas de Compostela nunha manifestación que colapsou a cidade desde as doce do mediodía.
Os organizadores falan de 50.000 asistentes e a Policía Local de 22.000 pero calquera das dúas cifras supón un éxito de participación. A praza do Obradoiro encheuse mentres ao casco vello seguían chegando xente berrando a favor dunha sanidade pública de calidade.
Na manifestación participaron os principais líderes políticos, excepto os do Partido Popular que consideran que se está politizando o conflito. A Plataforma SOS Sanidade Pública entregaba esta semana 50.000 sinaturas no Parlamento de Galicia que garanten a tramitación dunha Iniciativa Lexislativa Popular en defensa da sanidade pública e de apoio a atención primaria.
No obradoiro leuse un manifesto apoiado desde instancias de todo tipo. O escrito explica que a situación de precariedade é consecuencia das “inxustificadas baixadas dos orzamentos para a Sanidade aplicados polos sucesivos gobernos do Partido Popular, (mentres subían o orzamento doutras consellerías)”. Esta baixada de apoios económicos incidiu de forma especial na atención primaria que xa atravesaba unha profunda crise desde antes da pandemia.
O manifesto concreta problemas como os das listas de agarda “que poñen en perigo aos pacientes”. Aumentan os centros de saúde sen pediatras ademais de pecharse urxencias extrahospitalarias.
SOS Sanidade lembra que o orzamento da Consellería é a metade do necesario segundo a Organización Mundial da Saúde. Un gasto sanitario do 14% que debería ser do 25% segundo a OMS.
O manifesto tamén denuncia que este ano só se convocan 620 prazas mir das 725 dispoñibles polo ministerio. Que os últimos informes do Ministerio de Sanidade detectan un aumento en Galicia da mortalidade da mortalidade evitable e xeral, non explicable pola epidemioloxía. En Galicia espérase un ano por unha proba diagnóstica ou unha intervención cirúrxicas, así como entre 6-12 meses para unha primeira consulta para un especialista.
Por outra banda as urxencias hospitalarias acostuman a colapsarse pola demora nas citas de primeira consulta de Atención Primaria. A isto engadese a privatización de servizos como o de transporte sanitario que segue sen alcanzar os niveis mínimos de funcionamento mentres que os sucesivos concursos de concesión reciben en cada ocasión máis orzamento.
