Compostela, 15 de xuño do 2020 – O concello de Santiago inaugurou este sábado a primeira Feira do Libro de todo o estado Español.
A Feira do Libro de Santiago chega así a XXXIX edición na Alameda de Compostela, con menos expositores e con medidas hixiénicas centradas sobre todo nas distancias de seguridade e na desinfección.
A Feira, organizada pola Federación de Libreiros de Galicia, estará aberta ata o próximo día 21. O lema de este ano das feiras é “Non contaxian pero enganchan”, facendo referencia ao momento excepcional na que se celebran .
No acto participaron o Conselleiro de Cultura, Román Rodriguez; o alcalde da cidade, Xosé Sánchez Bugallo; Xurxo Couto, deputado de Cultura da Deputación da Coruña; Pilar Rodríguez, presidenta da Federación de Libreiros de Galicia, e a escritora María Solar que foi ademais a pregoeira. Solar lembrou o papel que xogaron os libros no confinamento e mostrouse orgullosa de ser a elixida para abrir a Feira xa que era Compostelá polos catro costados
Medidas de seguridade
Dende a Federación de Libreiros púxose en marcha un protocolo de seguridade, que están compartindo con outras comunidades no que, ademais de garantir o mantemento da distancia de seguridade; colocáronse xeles hidroalcohólicos en cada caseta, para desinfectar as mans antes de poder tocar os libros. Ademais, os libros que se merquen sacaranse directamente de caixas, para evitar posibles contaxios, e as casetas desinfectaranse con luz ultravioleta durante a noite.
