Compostela, 27 de outubro do 2022 – A V edición de Compostela Ilustrada contará con mais de 120 participantes de países como Italia, Francia, EEUU ou mesmo Illa reunión.
Compostela Ilustrada ten este ano como lema “A Santiago Vou” e foi presentada este mércores no concello de Santiago. No acto participaron Xurxo Souto en representación da Deputación da Coruña, Mercedes Rosón, concelleira de acción cultural, e Gemma Sesar, coordinadora do evento.
O certame celébrase do vindeiro día 3 ao 6 de novembro. Obradoiros na rúa, dúas exposicións, workshops e outras moitas actividades conforman unha Compostela Ilustrada repartida por lugares como o Auditorio de Galicia, o Mercado de Abastos, San Martiño Pinario, a libraría Cronopios ou a Casa do Taberneiro.
Entre as actividades destacan as Xornadas de Ilustración Urbana, que acollerá o Auditorio de Galicia o 3,4 e 5 de novembro. Precisamente será baixo a coordinación de Gemma Sesar e moderadas por Maru Godás. Ao longo de tres días, a Sala Mozart do Auditorio será lugar de encontro para afeccionados curiosos e público en xeral. Tamén alí se poderán escoitar as aportacións de diferentes profesionais do ámbito da ilustración con conferencias a cargo de Miguelanxo Prado, Rita Sabler, Marielle Durand ou Gala Pont.
Dúas exposicións estarán abertas ao público. A primeira será ‘Murales ilustrados’, que marcará o inicio desta nova edición da cita do debuxo por excelencia. Será o xoves 3 ás 13:00h en Afundación e servirá de escaparate de todos os murais que se elaboraron nas xornadas.
O venres cortarase a cinta da outra exposición, ‘Camiñamos para parar’ no Museo das Peregrinacións. Unha mostra partillada, de Miguelanxo Prado e Rita Sabler.
Ademais destas actividades, como novidade, este ano ofrécese unha beca para máis de 20 alumnos, en colaboración coa escola de deseño Mestre Mateo na que poderán aprender a facer un storyboard counha das figuras máis importantes do cómic en español, Francesc Capdevila, máis coñecido como Max.
