Obradoiros, charlas, funcións para adultos e cativos, Día de Portugal e galas coma a de inauguración conforman a ampla programación de Galicreques 2025
O Concello de Santiago acolleu a presentación do Festival Galicreques, que cumpre 30 anos e estreará 16 espectáculos na cidade entre o 11 e o 19 de outubro.
O Festival Galicreques está organizado pola Asociación Barriga Verde co apoio e patrocinio do Concello de Santiago, a Deputación da Coruña, a Xunta de Galicia e o Ministerio de Cultura e Deporte a través do Inaem e a Fundación SGAE. Compañías de Arxentina, Italia, Portugal, México ou Colombia darán a coñecer os seus novos espectáculos neste Galicreques tan especial, no que se festexarán tres décadas de traxectoria.
A concelleira de Capital Cultural, Míriam Louzao, destacou o apoio do Concello a “esta iniciativa que xa se consolidou como unha das citas culturais máis queridas e recoñecidas da nosa cidade” e que ofrece “máis de 60 funcións e a participación de máis de 20 compañías de 12 países distintos, dende Galiza ata Italia, Portugal, Colombia, Chile ou Arxentina”.
Na presentación participaron tamén Natividade González, deputada de Cultura da Deputación da Coruña; Jacobo Sutil, director da AGADIC; e Jorge Rey, director do Festival Galicreques.
O director de Galicreques, Jorge Rey, destacou que a actual edición é a máis ambiciosa, con parcipación de máis compañías que nunca e máis estreas. O director da AGADIC puxo o foco en que esta iniciativa vén sendo merecedora de xeito continuado de apoio financiero desta entidade, o que dá idea da súa calidade. Pola súa banda, Natividade González resaltou a consolidación que ten acadado esta cita de xeito internacional.
30 anos de Galicreques
O aniversario protagonizará dous actos dentro do cartel de Galicreques. O primeiro deles hoxe mércores 8 de outubro e consistirá nunha festa de inauguración que acollerá a Sala Capitol.
Ao longo da velada -pensada para ser un grande encontro do sector escénico en xeral e do teatro de monicreques en particular- sucederanse as actuacións e as sorpresas. A esta apertura só se poderá acudir con convite e marcará o inicio dunha colaboración coa Sala Capitol, recinto que se suma como espazo para o teatro de monicreques neste 30º Galicreques: o domingo 19 de outubro, ás 12.00 horas, o seu escenario recibirá a compañía aragonesa Teatro Arbolé e o seu espectáculo Los tres cerditos.
O segundo acto vencellado ao 30º aniversario terá lugar o luns 13 ás 20.00 horas na xa tradicional carpa que Galicreques instala na Alameda. A esa hora, diferentes artistas que actuaron ao longo dos anos no encontro compostelán ofreceranlle ao público as súas vinculacións artísticas e emocionais co festival, os monicreques e a mais cidade. Jorge Rey, director e fundador de Galicreques encargarase de moderala.
Aqui tes o pdf con toda a programación e a posibilidade de descargalo
Primeira estrea na Reixa
O sábado 11, A Reixa tenda acollerá a primeira estrea deste 2025 dentro do Galicreques: neste local a formación colombiana El Guiñol del Guiñol representará por vez primeira a obra El último árbol. Ese mesmo día ás 18.00 horas, no Centro Sociocultural do Romaño, chegaralle a quenda a compañía galega Mircromina Teatro, que presentará a súa nova proposta escénica: Pasmo de Pedra.
A partir dese primeiro día de festival, sucederanse as estreas. Dentro do cartel internacional, destacan os espectáculos inéditos de formacións como a Fío D’Azeite (Portugal), que estreará O rei va nú na carpa da Alameda o domingo 12; Títeres Candelilla (Chile), que farán o propio coa peza Kuiyen, sueño mapuche o martes 14 na Fundación SGAE; e Zaches Teatro (Italia), que botará andar en Galicreques a súa nova montaxe: Cenicienta.
Vellos coñecidos do público compostelá tamén escollerán o Galicreques para dar a luz os seus novos proxectos. É o caso de Panta Rhei, compañía vasca galardoada co Premio Galicreques en 2018, que presentará Krim, pequeño lobo o xoves 16, ou os catalán Fil de Guá, que sorprenderán ese mesmo día coa súa nova obra: Emproianova.
Clausura con Nauta
O domingo 19 de outubro, a compañía Nauta encargarase da clausura deste Galicreques de celebración. Farao no Teatro Principal coa súa nova obra, Ephimeros. A representación será ás 20.00 horas, xusto despois da entrega do Premio Galicreques 2025. A figura homenaxeada darase a coñecer proximamente.
A terceira compañía galega que estreará neste Galicreques, xunto a Nauta e Mircromina, será Kalina Teatro. A formación presentará a súa peza Limonardo dá vento o venres 12 no CSC de Santa Marta, dentro da programación escolar deste ano.
