Foliadas en Compostela presenta cinco citas que comezaran esta mesma semana e irán ata o mes de maio con novas actividades e obradoiros.
O proxecto Foliadas en Compostela arrinca unha nova tempada o xoves 3 de outubro, dando continuidade a unha iniciativa que xa é parte fundamental do lecer en Santiago de Compostela.
Mantendo o espírito participativo que leva máis de 20 anos enchendo Santiago de música e baile tradicional galego as foliadas en Compostela arrincan con 5 datas fixadas: 3 de outubro, 28 de novembro, 30 de xaneiro, 6 de marzo e 16 de maio.
Nesta primeira cita, o vindeiro 3 de outubro, chega tamén unha novidade especial: a recuperación de obradoiros previos á foliada, pensados para ampliar e compartir coñecementos antes do inicio da foliada.
Para inaugurar esta proposta contarán con Miguel Pardo, que impartirá un obradoiro de 1 hora e 30 minutos de duración, aberto tanto a persoas xa iniciadas no baile tradicional como a aquelas que aínda non tiveron ocasión de probalo.
Durante a sesión exploraranse recursos prácticos de diferentes puntos da xeografía galega, potenciando a creatividade e a improvisación, para que as persoas participantes poidan gañar autonomía nas foliadas e ampliar o seu abano de recursos coñecidos. O prazo para inscribirse remata o 1 de outubro.
Tras o obradoiro, a música continuará coa participación de tres grupos convidados:
Pandeireteiras da AC A Carrabouxa de Teo, Os Enxebres de San Lázaro e Tres Pes Pa´un Banco
Como vén sendo habitual, a actividade contará de novo coa colaboración da Nave de Vidán, un espazo que acolle regularmente as foliadas e reforza a súa conexión co tecido cultural e social da cidade.
Tamén se ofrece a posibilidade de asociarse a Foliadas en Compostela para gozar de descontos nas actividades que se organicen e contribuír á continuidade dunha iniciativa que xa é parte fundamental do lecer con identidade tradicional de Santiago.
Toda a información sobre horarios, inscricións no obradoiro e futuras programacións está dispoñible nas redes sociais oficiais da asociación (@foliadasencompostela) ou contactando coa asociación a través do seu correo electrónico foliadasnacidade@gmail.com
