Compostela, 12 de xullo do 2022 – A folga de recollida de lixo en Compostela, convocada desde o vindeiro día dezaoito, é o desenlace esperado dunha serie de situacións que se veñen producindo nas últimas semanas.
Queima de contedores, picada de rodas, e queixas de asociacións, partidos, e veciños en xeral rematan cunha convocatoria de folga na recollida de lixo. Trátase dun punto e seguido a unha situación que ven de tempo atrás. A necesidade de máis medios, materiais e humanos, é algo tan obvio como, polo que parece, difícil de conseguir.
Un paro “contra Santiago”
A situación repítese en multitude de ocasións, servizos e cidades. Outorgase unha concesión, os traballadores teñen un conflito coa empresa e a afectada é a veciñanza. O alcalde de Santiago, Xosé Sánchez Bugallo, repite sempre que o concello terá que reclamar á empresa pero que se trata dun conflito laboral do que o concello non forma parte.
No caso da folga de recollida de lixo, Bugallo dou un paso máis dicindo que se trata dunha folga “contra Santiago e contra Galicia”. Sánchez Bugallo espera que se esgoten as vías de negociación. En caso contrario asegura que se tomarán todas as medidas necesarias para garantir a saúde da poboación, e non descarta pedir o “estado de emerxencia sanitaria”.
Estas declaración provocaron o enfado do Comité de empresa quen dixo que se trataban dunhas valoracións “manifestamente a favor da empresa”, polo que lle piden respecto aos dereitos fundamentais das traballadoras e traballadores, así como que vele polo estrito cumprimento dos pregos de condicións.
Ao Comité “xéralle enorme perplexidade que Bugallo fale de aplicar o estado de emerxencia nas festas do apóstolo, cando o resto do ano lle dá igual a limpeza da cidade. Temos claro que con esta medida ao alcalde só lle preocupa o turismo e non a veciñanza de Compostela, parece que só ve contedores cheos de lixo ou lixo fóra destes cando hai festas”.
Unha oposición enfadada
O comité lembra que a esta convocatoria se chega despois de máis dous anos intentando abordar a situación do servizo co propio alcalde, “sen termos resposta a día de hoxe”. De feito, indican que foron os grupos da oposición quen se reuniron co comité e levaron varias preguntas ao pleno municipal sobre o estado da limpeza. “Preguntámonos que complicidades e beneficios pode estar sacando de mirar para outro lado e como consecuencia da súa ineptitude levar a toda a veciñanza a sufrer un servizo dunha baixísima calidade”.
O Partido Popular alertaba hai dúas semanas do lixo acumulado en alguns puntos da cidade e das queixas da veciñanza. BNG e Compostela Aberta acompañaron ao persoal de Urbaser no servizo de recollida nocturno e comprobaron as deficiencias “in situ”.
Foi o comité de empresa o que convidou os grupos municipais a realizar un percorrido pola cidade e observar os problemas fundamentais. Problemas de carácter estrutural, de falta de medios, de medios obsoletos e derivados da falta de recursos humanos que dificultan a recollida.
Unha das situación más excepcionais a explicaba a voceira do BNG, Goretti SDanmartín “O primeiro que vimos é que había unha persoa asignada para varrer toda a zona histórica e o Ensanche na noite do venres para o sábado; unha única persoa encargada de manter limpa manualmente toda esa área e, evidente, que desde o punto de vista humano, os recursos son claramente insuficientes”.
En esa liña o concelleiro de Compostela Aberta, Xan Duro, dicía que “non hai que explicar que é imposible que unha soa persoa atenda correctamente unha función que lle corresponde a cinco empregados, tal e como se especifica na oferta técnica pola que Urbaser gañou a licitación do servizo”. O edil incidiu en que “no que ten que ver co persoal, non hai ningunha escusa para non cumprir o prego, e o Goberno é responsable de non facer un control estrito do que está a pasar no servizo”.
Colectores soterrados que non encaixan, camións que van deixando regueiros de liquido, bolas fora dos contedores… A situación, vindo de asinar un novo contrato con abundantes melloras, é lamentable. A folga prevista non fará más que empeorala e poñer sobre a mesa unha situación que ven de meses, incluso anos, atrás.