Compostela,11 de decembro do 2024 – A Escola Municipal de Música prepara xa o seu Festival de Nadal, unha oportunidade para mostrar o aprendido e pasalo ben xuntos alumnos, profesores e familias.
Será este venres no Auditorio de Galicia ás sete da tarde, na Sala Brage. No concerto de Nadal participará o máis destacado da escola: os coros, a Bandiña, a Banda, o Combo de Música Moderna, a Agrupación de Música Tradicional, a Orquestriña, a Orquestra e a Big Band.
Cada un destes grupos ofrecerá unha selección de pezas que abranguen diversos xéneros e estilos musicais, que van desde a música clásica ata a moderna ou a tradicional, pasando por composicións propias da época do Nadal.
Con 440 alumnos matriculados, a Escola Municipal de Música consolidouse como un pilar fundamental na formación musical da cidade, proporcionando unha educación de calidade e fomentando o talento das novas xeracións de músicos. A súa oferta educativa, que vai dende a iniciación musical ata a formación profesional, permite aos estudantes desenvolver as súas habilidades nun ambiente estimulante e comprometido coa excelencia artística.
O Festival de Nadal é unha mostra do traballo realizado durante todo o ano, onde o alumnado ten a oportunidade de demostrar o aprendido nas clases e compartir a súa paixón pola música coa comunidade. Ademais, este evento xa se converteu nunha cita ineludible na axenda cultural da cidade, que convida a todos os veciños e veciñas a desfrutar do talento e a enerxía dos xoves músicos de Santiago de Compostela.
A entrada ao festival é de balde, previa reserva de entrada ata completar aforo, polo que todas as persoas amantes da música e da cultura están convidadas a desfrutar dunha tarde chea de emocións e sorpresas.
