Compostela, 27 de agosto do 2022 – Compostela remata esta semana as Festas do Apóstolo pero ven de presentar a programación do Festival C que será a seguinte cita na cidade.
Santiago acollerá no mes de agosto unha programación que, baixo o nome de Festival C, desenvolverá máis de 30 actividades dirixidas a todos os públicos e totalmente de balde. Os luns haberá propostas de danza, os martes de música e contos e os mércores será o día do circo e da poesía. Ademais complétase a proposta con xogos para a cativada e dúas intervencións de artes visuais.
A presentación da iniciativa correu a cargo da concelleira de Acción Cultural, Mercedes Rosón; o director-xerente do Auditorio de Galicia, Xaquín López, e o deputado de Cultura da Deputación da Coruña, Xurxo Couto.
Luns de danza, martes de música e contos e mércores de circo e poesía
Os luns a cita será coa danza no Cemiterio de Bonaval, sempre ás 20 h. O día 1 con ‘Emerxe’ de Galicia Danza Contemporánea que previamente, pola mañá, ofrecerá tres obradoiros dirixidos a distintos públicos, para continuar o día 8 con ‘Meeting Point’ de Ertza, dentro do ciclo Danza a Escena. O luns 22 chega Elvi Balboa co seu ‘Nasenda’ e pechamos a programación de danza o día 29 con Vacaburra e a Ukestra do Medio que presentan ‘Extravíos’.
Os martes será xornada musical. O día 2 ás 20 h co ‘Tierra y LIbertad’ de Wilson Saliwonczyk na Alameda e o día 30 con tres eventos (unha conferencia, un concerto e unha sesión DJ) arredor da clausura de Cardinais, a Academia de Vertixe Sonora 2022, ao longo da tarde e en diferentes espazos da cidade.
Os martes tamén serán días dos Contos no Parque, unha proposta do departamento de Lingua do Concello de Santiago dirixida aos e ás máis pequenas da casa. A cita será cada semana ás 18 h na zona dos arcos do parque de Bonaval. O día 2 con Teatro Ghazafelhos e ‘A caixa sen Pandora’, o 9 coa ‘Roupa tendida’ de Xarope Tulú, o 16 con ‘Coser e cantar’ de Marta Ortiz, o 23 con A xanela do Maxín e o seu ‘Lúa quere viaxar a Marte’ para pechar o ciclo o día 30 con ‘Terra’ de Xogos Miudiño e ‘Orella pendella’ de Bea Campos.
Dentro das artes escénicas, ademais da danza, haberá unha ampla proposta de circo que será os mércores. Todos os eventos ás 20.00 h e na praza da Quintana agás o primeiro, ‘Pelat’ de Joan Catalá que será en Bonaval, xunto ao CGAC, o día 4. Os outros serán o 11 ‘Poi’ da Compañía d’es Tro, o 18 ‘MLM (Mentir lo Mínimo)’ de Alta Gama e o 25 ‘Kaldi’ de Al Grano. Ademais, haberá como xa é habitual ‘Circo no parque’, os obradoiros de circo para nenos e nenas de 3 a 14 anos con Circonove. Serán no Centro Xove da Almáciga, tamén os mércores pero de 11.30 a 13.30 h e haberá que inscribirse previamente en circonoveoficina@gmail.com.
Os mércores serán ademais días de poesía coa proposta ‘Os fíos, as sementes’ que nos ofrece diversas voces ás 20.00 h no parque da Alameda, xunto á estatua de Lorca. O día 10 Alicia Fernández e Berta Dávila presentan ‘Poemas novos e vellos para un día de verán’, o 17 estará Jesús Castro Yáñez con ‘Seguir un rastro’, o 24 Isaac Xubín con ‘Non todo será silencio’ e pechamos o 31 con Cinta Adhesiva.
Xogos e exposicións completan a proposta
As actividades do Festival C complétanse co Territorio Xogantín para a rapazada de 6 a 10 anos que ten unha cita para divertirse coa lingua galega como fío condutor todos os días do 1 de agosto ao 2 de setembro na praza 8 de marzo de 11.30 a 13.30 h. Trátase dun tempo de socialización a través do xogo e o patrimonio lingüístico vinculado a el, no que a cativada interaccione nun ambiente en que o galego é a lingua de referencia e se apropie do espazo público. Acolleranse participantes por orde de chegada ata completar o máximo de 20 e en caso de choiva será no CSC da Caramoniña.
E tamén dúas intervencións de Artes Visuais que ten abertas neste momento Compostela Cultura. No Auditorio de Galicia, ‘Sons improbábeis’ comisariada por Iñaki Martínez Antelo e na que podemos ver a proposta de 15 artistas que traballan co musical como tema dende disciplinas máis tradicionais da práctica artística como a pintura ou a escultura explorando as diferentes dimensións do son dentro das artes visuais. Do 15 ao 28 de agosto e as tardes dos domingos, o Auditorio estará pechado. O resto de días pode visitarse de 10 a 14 e de 16 a 20 h.
Na Zona C está ‘El jarrón infinito’, intervención que Mar Ramón Soriano (Valencia, 1993) contextualiza na investigación procesual e teórica que vén desenvolvendo ao situar a materialidade das cousas no seu centro de interese. Estará aberta de martes a sábado de 11 h a 14 (agás festivos).