Desde o vindeiro día 28 Compostela abre as portas á festa máis picheleira a dicir de nós mesmos, a da Ascensión. Este ano a actuación de Tanxugueiras será un dos destacados do menú con permiso de Guadi Galego ou Queralt Lahoz.
A Ascensión comezará o mércores 28 de maio e estenderase ata o domingo 1 de xuño cun programa repleto de concertos e actuacións musicais, circo e eventos deportivos, sen esquecer a vertente máis tradicional con citas como a comparsa de Cabezudos, o Torneo da Chave ou os Cantos de Taberna.
Guadi Galego, Tanxugueiras ou Queralt Lahoz son algunhas das actuacións destacadas así como o concerto dos 40 e o Composfest. O Recinto Feiral de Amio acollerá a Festa das Persoas Maiores o sábado 31 e a popular Feira Cabalar durante a xornada do xoves da Ascensión.
A concelleira de Festas, Pilar Lueiro, presentou o programa completo das Festas da Ascensión que podedes descargar no seguinte enlace
A concelleira fixo referencia ao cartel daAscensión, autoría de Rosa de Cabanas, “que centra a maior parte da súa obra na imaxe das mulleres, e que en este caso apoiouse nunha fotografía dunha feira de gando na Carballeira de Santa Susana no ano 1919, na que aparecen varias mozas en primeiro plano, termando do gando”.
Estas mozas aparecen na parte inferior do cartel, “como se fosen a raíz oculta, mentres que na parte superior aparecen as mesmas mozas pero nun tempo actual, con vestimenta contemporánea e portando cadansúa pandeireta. Atención aos zocos, son antigos e son contemporáneos”, mesturando pasado e presente e rendendo homenaxe tamén ás Letras Galegas.
Programa
As festas terán lugar do mércores 28 de maio ao domingo 1 de xuño, mais as atraccións estarán xa na Alameda desde o día 17 de maio e manteranse ata o 3 de xuño. A concelleira lembrou tamén que se manteñen tanto os horarios inclusivos sen ruído, que serán os días 23 e 31 de maio e o 1 de xuño de 17 h a 19 h, como o Punto Lila, que estará instalado na Alameda desde o 28 ao 31 de maio, cun horario de atención de 20 h a 01 h.
Dentro do programa, Lueiro destacou “a forte aposta que facemos este ano pola música galega e en galego, en formatos e estilos moi variados: grandes concertos como As Tanxugueiras, Ailá e Guadi Galego, as alboradas e ruadas a cargo de agrupacións folclóricas e grupos de música tradicional do noso Concello, os cantos de taberna, o Composfest, a Romaría das Flores ….”. Non faltarán as tradicionais citas como o concurso cabalar, o torneo da chave ou os cabezudos.
As festas arrancan o mércores 28 cos Cantos de Taberna e co concerto Santiago 40 Pop ás 21.00 h na praza da Quintana con Depol como un dos artistas principais. O día grande da Ascensión, o xoves 29, comeza con alboradas e continúa cun concerto da Banda Municipal ás 12 h na praza da Quintana, acompañada de Ultreia.
Os cabezudos animarán a xornada a partir das 12.30 h e quen o prefira poderá darse unha volta polo recinto feiral de Amio para ver a tradicional feira cabalar. Xa pola tarde será o tempo do completo programa de Folk na rúa e do concerto da Real Filharmonía (ás 20.30 h no Auditorio de Galicia). O prato forte chegará ás 21 h na praza da Quintana co concerto de Tanxugueiras. Na alameda estará a Orquestra Marbella.
O venres 30 gozaremos con outro clásico, o Composfest, cheo de boa música e que “será presentado en breve”, segundo indicou a concelleira. Tamén terá lugar o XLVIII Torneo da Chave na Alameda. O día complétase con alborada pola mañá e orquestra pola noite.
O sábado 31 de maio será a xornada da Festas dos Maiores, da exposición de vehículos clásicos e contemporáneos ou das escolas de baile tradicional nas prazas da zona vella e da Romaría das Flores en Belvís. A praza da Quintana acollerá o concerto de Queralt Lahoz, dentro do ciclo SON Estrella Galicia.
O último día das festas, o domingo 1, celebrarase a XXIV Carreira da Ascensión e un novo concerto da Banda Municipal, neste caso con Ailá. Tamén haberá circo para a cativada na praza de Mazarelos. Guadi Galego será a encargada de poñer o broche final ás festas picheleiras por excelencia cun concerto ás 20.30 h na praza da Quintana.
