Compostela, 7 de agosto 2024 – A concelleira de Promoción presentou a campaña “Feito en Santiago”, que ten como obxectivo “poñer en valor as iniciativas empresariais locais que contribúen ao desenvolvemento económico do noso municipio”.
“Feito en Santiago” inclúese no programa “Compostela Móvese” de apoio á cultura emprendedora, e vaise desenvolver ata o mes de novembro. Rozas explicou que se fai “co obxectivo de poñer en valor empresas e pequenos negocios que contribúen a construír cidade”.
Trátase, segundo a concelleira, de crear “unha imaxe de marca que anime ao emprendemento e asentamento de novos proxectos en Santiago, e que dea a coñecer entre a veciñanza os valores engadidos destas inciativas empresariais”.
Imaxe de marca
“Feito en Santiago” inclúe as variantes “Faino en Santiago”, “Faise en Santiago” e “Fanse en Santiago”. A imaxe de marca, de corte moderno e limpo, destaca o nome de “Santiago” subliñándoo de diferentes cores, cada unha delas relacionada cunha área de impacto: o amarelo, para os proxectos que empurran a economía local; o vermello, para os que dignifican a vida cidadá; o azul, para os que contribúen á cohesión social; o morado, para a promoción da educación, patrimonio e arte; o laranxa, para aquelas iniciativas sobre mobilidade e territorio, e o verde, centrado nos emprendementos que apostan pola sustentabilidade e transición verde.
A campaña de comunicación realizarase entre os meses de agosto e novembro, e nela promocionaranse ata 30 iniciativas empresariais e institucionais vencelladas ao ámbito do desenvolvemento económico que operen en Santiago de Compostela.
Procúrase así a promoción dos sectores estratéxicos para a economía local, coma a biotecnoloxía e as ciencias da saúde; a transformación da madeira; a economía social vinculada ao terceiro sector; as industrias relacionadas co turismo; as industrias culturais e creativas; a economía circular; a economía de proximidade, e a silver economy.
