Compostela, 5 de agosto do 2024 – As prazas e rúas da zona vella de Compostela acollen desde hoxe e ata o 24 de agosto unha nova edición do Feito á Man.
Feito á Man está impulsado desde a Asociación Cultural Cidade Vella e conta coa colaboración do Concello de Santiago e a Deputación da Coruña, e apoiado por outras empresas colaboradoras.
Trece escenarios acollerán máis de corenta propostas artísticas de diferentes estilos musicais
O escenario central será novamente o NARF, instalado na Praza da Quintana e en Praterías. Baixo o lema “a cidade paralela, aquela que nos habita”, o festival celebra o seu 21º aniversario.
Do 5 ao 24 de agosto, a Rúa de Santo Agostiño, Praterías, a Praza dos Gatos, a Praza de Feixóo, a Quintana, a Vía Sacra ou San Paio de Antealtares serán algúns dos trece espazos da cidade histórica nos que se poderá gozar de música ao vivo.
A programación contará con recoñecidas bandas da escena musical galega como Ruxe-Ruxe, Ailá ou Biribirlocke, mais tamén de novas formacións como Pablo Leira ou o dúo composto por Gloria Pavía e Rafa Morales. No menú musical deseñado por Ánxeles Porto para este caloroso mes de agosto, súmanse tamén propostas artísticas chegadas doutros países.Os arxentinos Claudio H. Mestís Trío e Lacandona, tamén fan parte do cartaz xunto a outras moitas artistas internacionais.
Tamén se poderá gozar nas rúas da cidade vella de grupos coma os cubanos LAYUCA, David Alvarez y el trío Café Son ou Alejandro Vargas trío, que o público desfrutará nunha proposta de directo acompañado do galego Xosé Miguélez.
O Feito a Man 2024 comeza hoxe na Praza dos Gatos cun concerto de Verónica Codesal e rematará o día 24 de agosto no Escenario NARF da Quintana co grupo Chekan
A programación completa pódese consultar na web do festival: www.festivalfeitoaman.gal
