Compostela, 1 de decembro do 2022 – O Observatorio Astronómico Ramón María Aller, OARMA, da USC inaugura, hoxe, no Claustro Alto de Fonseca a exposición “Xoias do ceo”.
A mostra “Xoias do ceo” reúne imaxes en alta resolución do sistema solar e do ceo profundo acompañadas do comentario científico elaborado por José Ángel Docobo, Pedro Pablo Campo Díaz e Xabier Pérez Couto. A exposición estará aberta ata o 20 de xaneiro.
A Lúa, o Sol, os planetas Marte, Xúpiter e Saturno e o cometa Leonard amósanse en dez fotografías realizadas por Salvador Ortega Saura. Outras vinte e oito instantáneas realizadas por Francisco Javier Cerdán Nuñez retratan estrelas, estrelas múltiples, e cúmulos estelares, amais distintas nebulosas pertencentes á Vía Láctea, e inclúen tamén unha vista parcial da nosa galaxia e imaxes doutras cinco galaxias diferentes.
Os textos explicativos que acompañan ás fotografías foron elaborados no Observatorio Astronómico Ramón María Aller da USC por José Ángel Docobo (xestor da exposición), Pedro Pablo Campo Díaz e Xabier Pérez Couto, que tamén son responsables da preparación de información e textos adicionais, como o texto introductorio, outro sobre os inicios da fotografía aplicada á astronomía, e un resumo das técnicas utilizadas na captura das distintas imaxes astronómicas.
En palabras do Profesor Docobo, “esta exposición é un claro exemplo de colaboración da astronomía profesional coa afeccionada” e demostra que “a pesar de que hoxe en día os telescopios espaciais nos marabillan con fotos espectaculares, non é menos certo que aínda dende lugares ben escuros da Terra, aínda poden obterse fotos de gran calidade e alta resolución como as que poden contemplarse nesta bonita exposición, que sen dúbida ten un alto interese tanto didáctico como informativo”. A mostra conta co apoio da Xunta de Galicia- Xacobeo 21-22, o Ministerio de Ciencia e Innovación, do CITMAga e de Óptica Val. Pode ser visitada de luns a venres de 11 a 14 horas e de 17 a 20.30 horas.