Compostela, 30 de outubro do 2019 – Onte presentábase a ópera A Amnesia de Clío do compostelán Fernando Buíde e producida pola Xunta de Galicia e a compañía Voadora.
Será estreada o 10 de novembro no Auditorio de Galicia coa participación da Real Filharmonía e o Orfeón Terra Nosa dirixido por Miro Moreira. A Amnesia de Clío ten libreto de Fernando Epelde e a dirección escénica corre a cargo de Marta Pazos e a musical de Paul Daniel.
Muller en mundo de homes
A amnesia de Clío é unha ópera contemporánea de gran formato cunha temática moi actual: o cambio de paradigma que supón a entrada da muller tanto na alta política, rexida habitualmente por impulsos testosterónicos, como no mundo da arte, subvertendo a relación musa/artista.
Trátase dunha viaxe extravagante, na que a realidade histórica e a ficción políticas entrecrúzanse para crear unha obra cun pé na realidade e outro na distopía, unha distopía escrita en clave feminista. Xoga con realidades que mesturan arte e política, inspiración e realidade, e faino partindo de feitos constatados. Como por exemplo, a vertente artística desenvolvida polo ex presidente dos Estados Unidos George W. Bush tras a súa saída da Casa Branca, cando comeza a pintar retratos doutros dirixentes políticos ou dos soldados que enviou á guerra de Irak. Todo iso vertebrado a través da figura de Clío, musa da Historia encarnada no libreto por unha muller forte, unha artista plástica cunha vida chea de matices que a levan a desembarcar na vida política. Unha viaxe en sentido inverso á do seu antagonista na ópera: a musa rebélase para reivindicar o papel da muller máis aló da inspiración.
O autor
A ópera é o resultado de dous anos de traballo do compositor compostelán Fernando Buíde. Doutorado na Universidade de Yale, foi compositor residente na Real Academia de España en Roma. Durante a temporada 2014-15 foi o compositor español actual máis programado por orquestras sinfónicas profesionais de España. Entre outros premios recibiu o AEOS-BBVA na súa sétima edición, o premio Michael Friedmann de investigación da Universidade de Yale ou o premio Harry Archer de composición orquestral.
O elenco
A batuta levaraa o director titular e artístico da RFG, Paul Daniel; coa colaboración como director asistente do mestre galego Pablo Devigo. Serán máis de 70 artistas en escena. O rol feminino principal, o da musa Clío, interpretarao a soprano canaria Raquel Lojendio. Ademais, contarase coas voces do barítono valenciano Sebastià Peris no papel de George e da mezzosoprano cántabra Marina Pardo como Mannon/Merkel; xunto ao compostelán Orfeón Terra A Nosa que dirixe Miro Moreira.