Compostela, 9 de febreiro do 2023 – Unha das tradicións máis divertidas de toda a bisbarra e a do Meco en Compostela, que volverá este ano ao balcón do Pazo de Bendaña.
O vindeiro sábado 18 haberá de novo un desfile do Meco que partirá as oito da tarde da Praza do Obradoiro. Acompañado polos Conformistas de Conxo, A Ruliña de Laraño e Os Armatroulas de Laraño, percorrerá as rúas do casco vello ata chegar ao Toural. Ali terña lugar o pregón do Entroido 2023 que estará a cargo de Talía Teatro.
O concelleiro de Festas, Sindo Guinarte, e a concelleira de Centros Socioculturais, Mercedes Rosón, explicaron en rolda de prensa o programa de actos do Entroido 2023 en Compostela. Ao día seguinte de colocar ao Meco en Bendaña. O domingo comezará coa animación de rúa dos Conformistas de Conxo e cos Entroidos de Vilariño de Conso e Santiago de Arriba (Chantada). A cita central da xornada será o Festival Infantil de Disfraces que se celebrará na Sala Capitol e no que poderá participar todos os menores de 14 anos, con entrada libre e inscrición previa (entre as 16.30 h e as 17.45 h). Haberá baile, sorteo de agasallos e concurso de disfraces en tres categorías: individual, parella ou grupo.
Os cativos serán tamén os protagonistas das propostas programadas para o luns 20 de febreiro. No CSC Maruxa e Coralia haberá obradoiros de máscaras divertidas entre as 10.00 e as 14.00 horas, con reserva de prazas no propio centro. Pola tarde tamén haberá pasarrúas coa charanga Bicoia e os Armatroulas de Laraño, dende a praza Roxa ata a rúa de San Pedro.
Destaca, ademais do Meco, o tradicional desfile de disfraces o martes 21 no que se premiarán as mellores parellas, grupos, comparsas ou carrozas. Partirá da avenida de Ferrol ás 17.30 horas e percorrerá as rúas Frei Rosendo Salvado, praza Roxa, República do Salvador, Hórreo, Senra e avenida de Xoán Carlos I. Ao remate do percorrido, os participantes concentraranse na Sala Capitol, onde a partir das 20:00 horas terá lugar a presentación do espectáculo Entroidanzas, con Pesdelán, e, posteriormente, a entrega dos premios do desfile.
Xa ao día seguinte, o mércores 22 de febreiro, Santiago despedirá o Entroido coa Queima do Meco na praza Roxa, despois do seu desfile dende a praza do Toural pola rúa Nova, rúa do Vilar, Senra, Doutor Teixeiro e República do Salvador. Todas as persoas que o desexen que deberán vestir rigoroso loito para a ocasión.
Xenerais da Ulla
A programación complétase co Entroido tradicional dos Xenerais da Ulla que o sábado 25 protagonizará o desfile das Xeneraliñas da Semente ás 12.00 h dende Santa Clara e con remate na praza de Cervantes, onde poderanse escoitar os tradicionais vivas e atranques. Tamén haberá ocasión de vivilos nas parroquias de Marrozos (sábado 11), Angrois (domingo 12), Aríns (sábado 18) e O Eixo (domingo 19). Neles está inspirado o cartel deste ano, obra do deseñador Álex Rozados.
O propio día 25 de febreiro aínda se poderá desfrutar da festa cos Entroidos rurais en Compostela de 18.00 h a 19.30 h e co Entroido de Conxo (durante todo o día), organizado pola Coordinadora de Festas Tradicionais do barrio.
