Compostela, 2 de febreiro do 2023 – A necesidade de máis e mellor espazo para a escola de idiomas de Santiago é unha realidade que se impón ano a ano e que se demanda desde a institución desde hai tempo.
O BNG levará a pleno unha moción que se propón destinar os edificios de Ciencias da Educación, coñecido por todos como Maxisterio, e Enfermaría á nova Escola Oficial de Idiomas. Compostela tería que cambiar o planeamento urbanístico e a Xunta comprar e rehabilitar os edificios.
A voceira nacionalista ,Goretti Sanmartín, explicou que estas parcelas teñen na actualidade uso hoteleiro, “un uso que, desde a nosa perspectiva, debe modificarse o máis axiña posíbel para garantir que existan, nas proximidades da cidade histórica, usos vinculados a servizos que se presten para persoas residentes, para o conxunto da poboación da comarca de Compostela e para que se manteña o uso educativo”.
A voceira do BNG considera que se trata dunha decisión estratéxica sobre o modelo de cidade que se quere “Cómpre facer unha reflexión sobre os usos que queremos ter e xulgamos errada a liña de expulsar do centro todo aquilo que lle dá vida no día a día”, afirmou. “Son estas decisións transcendentes, que poden provocar mudanzas relevantes na recuperación da vitalidade da cidade histórica, porque queremos unha cidade para vivir, para as persoas que residen aquí, e non un escaparate para ver, un decorado de película”.
Trátase dunha superficie de 8.948 metros cadrados que supera a parcela situada en Santa Marta, 6.200 m2, que o concello ofreceu á Xunta para a Escola de Idiomas. O BNG estima que cómpre catalogar e protexer eses inmóbeis, de maneira particular as súas fachadas. Lembra ademais que cando cumpriu 20 anos houbo un compromiso público da Xunta e do Concello para solucionar as demandas históricas.
As condicións actuais da Escola Oficial de Idiomas incumpren o Decreto 81/2018 de 19 de xullo de 2018 das ensinanzas de idiomas de réxime especial en Galiza, que determina as características das instalacións e recursos docentes. Santiago de Compostela é unha cidade universitaria, con alta afluencia de turismo estranxeiro e cabeceira de comarca. Mais por esta carencia de espazo na Escola Oficial de Idiomas, só se poden impartir sete linguas, cando hai demanda doutros chinés, de xaponés, de ruso, de árabe que non se poden ofrecer. O 19 de outubro de 2017 aprobouse no Pleno unha declaración institucional para reclamarlle á Xunta a construción do novo edificio da Escola Oficial de Idiomas. Deste xeito, a Escola pode ser un importante elemento de dinamización, crear sinerxías coa biblioteca Ánxel Casal e co Colexio López Ferreiro, e será unha maneira de dinamizar a zona histórica e de ocupar o centro da cidade con residentes. Os datos de alumnado son relevantes, 3005 alumnos/as oficiais, sen contar co alumnado libre, distribuído este curso en 2427 en Vite e 578 en Sar.
