Compostela, 03/06/2026 – O Concello de Santiago de Compostela e EspazoCoop, Unión de Cooperativas EspazoCoop, presentaron as actividades do convenio de colaboración 2026, enmarcado no programa municipal “Feito en Santiago coa Economía Social”.
Un convenio que dá continuidade a anos de traballo conxunto e que reafirma o compromiso do Concello de Santiago coa economía social e o cooperativismo como ferramentas de desenvolvemento local.
O programa deste ano articúlase en catro liñas de acción complementarias, pensadas para chegar a públicos distintos: desde a cidadanía e as persoas que visitan a cidade, ata o alumnado de formación profesional e as propias cooperativas compostelás.
Ana Olveira Blanco, Presidenta da Unión de Cooperativas EspazoCoop explicou que “Este convenio representa un paso máis na construción dun ecosistema cooperativo sólido en Santiago de Compostela. A nosa colaboración co Concello é a mellor demostración de que apostar pelo cooperativismo desde o ámbito local ten sentido, ten continuidade e ten resultados. Estamos moi satisfeitas de poder seguir avanzando xuntas”.
Pola súa banda, María Rozas Pérez, Concelleira de Dereitos e Servizos Sociais, Promoción Económica e Xuventude do Concello de Santiago de Compostela, lembrou que a economía social é un dos eixos vertebradores da Axenda Urbana 2030, “porque é un modelo que contribúe a lograr os Obxectivos de Desenvolvemento Sostible fixados por Nacións Unidas a través de proxectos empresariais centrados nas persoas, respectuosos co medio ambiente e comprometidos coa igualdade”.
A concelleira puxo en valor o ecosistema da economía social que temos en Santiago “con máis de 100 cooperativas e 70 sociedades laborais, que son rendibles en diferentes sectores como a cultura, a alimentación, o deporte, as telecomunicacións ou os coidados”.
Catro liñas de acción para o cooperativismo compostelán
Do Roteiro Cooperativo realizaranse catro edicións e cada roteiro terá unha duración de tres horas e incluirá visitas a catro cooperativas, que explicarán a súa experiencia e mostrarán a súa actividade. O punto de encontro será a Alameda de Santiago.
A liña de sensibilización en centros de ensino levará o cooperativismo ao CIFP Politécnico de Santiago de Compostela mediante catro charlas dirixidas ao alumnado de formación profesional e prográmanse para o inicio do vindeiro curso. O obxectivo é achegar o emprendemento cooperativo como alternativa real e viable á hora de construír un proxecto profesional.
A exposición itinerante “Cooperativas de Compostela” constará de 20 paneis que percorrerán centros socioculturais e educativos da cidade. A mostra combinará unha introdución teórica ao cooperativismo con paneis dedicados a cada cooperativa participante e fotografías das persoas que as integran, subliñando que o cooperativismo se constrúe desde as persoas.
Finalmente, o Encontro de intercooperación “Coñéceme para poder gustarte” reunirá durante catro horas ás cooperativas de Compostela e a súa contorna para que se coñezan entre si, identifiquen sinerxias e exploren posibilidades de colaboración e intercooperación.
Unha colaboración con traxectoria
EspazoCoop e o Concello de Santiago de Compostela levan anos contribuíndo a cunsolidar un ecosistema cooperativo cada vez máis visible e articulado na cidade, a través de roteiros, charlas, encontros e accións de visibilización. A renovación do convenio en 2026 chega nun momento de especial relevancia para o movemento cooperativo, tras o impulso do Ano Internacional das Cooperativas 2025, declarado pola ONU.
Sobre EspazoCoop A Unión de Cooperativas EspazoCoop é unha entidade multisectorial de carácter empresarial, configurada como asociación sen ánimo de lucro, de ámbito galego, integrada por cooperativas de distintas clases, inspirada nos principios cooperativos e os seus valores, que ten como obxectivo: agrupar, representar, impulsar, fomentar a intercooperación e defender os intereses das súas cooperativas socias e das persoas que as constitúen, así como a divulgación, fomento e consolidación do cooperativismo, como ferramenta de desenvolvemento socioeconómico, no marco da economía social e solidaria.
