Compostela, 6 de marzo do 2023 – O concello de Santiago presentou a programación do Día Internacional da Muller, 8 de marzo, un ano máis arredor da iniciativa “Artellando Feminismo”.
O programa d Día da Muller comeza esta tarde, no Auditorio de Galicia, ás 18:00 h, coa gala “Mulleres de Compostela” na que se homenaxearán varias mulleres e colectivos que “forman parte da historia viva da cidade e que se distinguen polo seu labor a prol da igualdade”.
A continuación, ás 20:00 h, a Escola Municipal de Música acollerá un faladoiro baixo o título “Músicas na música: territorio das mulleres”, organizado polo Departamento de Educación do Concello. Na mesa de debate estarán a vocalista e compositora, Xiana Lastra; Aitana Cuétara, productora, manager e programadora; Elba Fernández, compositora e diseñadora gráfica e Beatriz Busto, musicóloga e docente.
A programación foi presentada pola concelleira de Igualdade, Mercedes Rosón, acompañada por Teresa Furelos, xefa do Servizo de Políticas Sociais, e Yara Prieto, responsable de proxectos de Artellando Feminismo. Rosón recordou a necesidade neste 8M de que “as voces das mulleres se volvan unir para pedir a igualdade real e efectiva” e non “perder os espazos de igualdade conquistados nos últimos anos”.
O día central, o 8 de marzo, terá lugar o fallo dos premios Xohana Torres ás 11 da mañá no Pazo de Raxoi, seguido pola lectura do manifesto ás 11:30 na praza do Obradoiro. Mercedes Rosón animou a todas as persoas a participar nestas actividades, que son de balde, e que “nos axudarán a comprender e visibilizar a actual situación da muller e a analizar que aspectos debemos mudar para acadar esa plena igualdade”.
Artellando Feminismo
Artellando Feminismo naceu no ano 2019 coa finalidade de animar á sociedade compostelá a implicarse de xeito activo na transformación social no ámbito da igualdade. Tras catro anos, Artellando Feminismo conta con entidade propia e converteuse nun referente a prol na igualdade entre a cidadanía compostelá, así como un referente cultural na nosa cidade.
No cadro do programa Artellando Feminismo, celebraranse ao longo do meses de marzo e abril numerosas actividades cunha liña lúdica e pensadas tamén para o entretemento, enfocadas a un público heteroxéneo e con temáticas que abordan cuestións de interese xeral, sempre con perspectiva de xénero.
Dentro do amplo programa desta edición, destaca a obra de teatro “Gordas”, na que máis de dez personaxes en situacións e mundos moi diversos interpretan unha comedia na que se reflexiona sobre a delimitación dos espazos segundo a aparencia física. Pódese ver de balde o próximo 29 de marzo, no Teatro Principal.
Toda a programación de Artellando na súa páxina web.
