Compostela, 25 de xaneiro do 2023 – Santiago recupera unha das súas citas máis festeiras, o desfile de Entroido, e o concurso de disfraces, volverá as rúas de Compostela este ano.
Sindo Guinarte, responsable de festas, presentou os pormenores do concurso e as condicións para os que se queiran presentar. O desfile de Entroido terá lugar o vindeiro 21 de febreiro. As mellores carrozas, comparsas, grupos, parellas e disfraces individuais optarán aos premios. Tamén terá un galardón especial a mellor comparsa procedente das parroquias e barrios de Compostela.
A data límite para a inscrición é o 8 de febreiro. En canto os premios, para as carrozas haberá tres premios de 3.000, 2.000 e 1.000 euros. No caso das comparsas, que estarán compostas por un mínimo de 15 persoas, entregaranse premios de 2.400, 2.000 e 1.000 euros. Na categoría de grupos, formados por entre 6 e 15 persoas, hai tamén tres premios, de 800, 400 e 200 euros.
Ademais, entregarase un premio de 400 euros á mellor parella; e tres premios aos mellores disfraces individuais, de 300, 200 e 100 euros. Por último, recoñeceranse as mellores comparsas procedentes das parroquias e barrios de Santiago, con tres premios de 1.200, 600 e 400 euros.
O desfile do martes de Entroido sairá da avenida de Ferrol, pasando polas rúas de Frei Rosendo Salvado, praza Roxa, República do Salvador, Hórreo e Senra, para rematar na avenida de Xoan Carlos I. A entrega de premios terá lugar na Sala Capitol, na rúa Concepción Arenal.
