Compostela, 24 de decembro do 2024 – Xa case ninguén fala da parcela de Peleteiro e o seu futuro pero, como aquel vello anuncio da televisión. Volve a casa polo Nadal.
O Concello de Santiago ven de denegar a licenza para a construción de dúas edificacións no antigo colexio Peleteiro. Como o tema ven de anos, no seguinte enlace podedes reler algúns dos fitos de esta historia. https://lindeiros.net/?s=peleteiro .
O que a Xunta de Goberno Local de Santiago denega é a licencia de obra presentada para peleteiro por un fondo de activos bancarios, Arqura Homes, por incumprir as normas do hábitat e non incluír o proxecto de urbanización esixido polo planeamento PERI-12.
O concelleiro Iago Lestegás detallou que a denegación por parte municipal vén motivada porque o proxecto incumpre as Normas de Habitabilidade de Galicia no referido aos servizos das vivendas, en concreto no relativo á disposición de espazos de almacenaxe, e porque omite o proxecto de urbanización do espazo libre público
Segundo explicou o concelleiro, o planeamento PERI-12, aprobado en 2005, que o proxecto presentado executa, permite simultanear as obras de urbanización e as de edificación. As de urbanización consisten fundamentalmente na apertura dunha nova rúa de trazado curvo que conectaría San Pedro de Mezonzo e República Arxentina e que serviría de soporte ás novas edificacións.
Sen embargo, o plan de etapas do PERI-12 establece a necesidade de aprobar un proxecto de urbanización, que debe tramitarse de acordo co procedemento correspondente e polo tanto debe ser sometido á información pública durante un prazo mínimo dun mes, xa que “o dereito de participación da cidadanía no procedemento de execución do planeamento ten carácter esencial”.
Deste xeito, dado que PERI-12 esixe “non só a aprobación do proxecto de equidistribución aprobado en 2005, senón tamén a aprobación dun proxecto de urbanización, a súa omisión podería determinar a nulidade de pleno dereito do acto administrativo de concesión da licenza de obra”, detallou o edil.
Iago Lestegás tamén recordou que tras a xuntanza mantida o pasado mes de maio co ministro de Economía, Carlos Cuerpo, “na que acordamos traballar nunha modificación do planeamento no ámbito do antigo colexio Peleteiro que priorizase o uso residencial e incorporase unha reserva importante de vivenda protexida”, o Concello remitiulle unha proposta á propiedade dos terreos que inclúe unha reserva do 45% de vivenda protexida ao mesmo tempo que “mantén o aproveitamento lucrativo e por tanto mantén a rendibilidade económica da operación, atendendo as esixencias da propiedade”. “Estamos convencidos de que é unha moi boa solución pero a propiedade aínda non deu a súa conformidade”, concluíu.
Papa Noel, o Apalpador, ou calquera outro ser imaxinario podería traer en estas datas unha solución pero o certo e que non sucedeu. Teremos que seguir mirando os muros de Peleteiro por si en algún momento mudan en praza pública.
