Curtocircuíto múdase ao verán de Santiago de Compostela. Divídese ademais en dúas fases, a primeira esta mesma semana.
O Festival Internacional de Cinema Curtocircuíto, organizado polo Concello de Santiago de Compostela (Compostela Cultura), celebra a súa vixésimo segunda edición cunha renovación de modelo e un adianto de datas.
Curtocircuíto volve ás rúas entre o 1 e o 6 de xullo. O obxectivo é xerar espazos de intercambio entre a cidadanía e os artistas nos que compartan e reflexionen sobre o seu traballo. Arredor deste modelo renovado, a concelleira de Capital Cultural Míriam Louzao destaca a súa “aposta firme polos novos talentos, pola educación no pensamento crítico e pola creación de comunidade a través dos filmes”.
O director artístico de Curtocircuíto, Pela del Álamo, apunta que “devolver Curtocircuíto ao seu formato orixinal é un bonito reto que sen dúbida abrirá o festival a un público máis diverso. Os cinemas de verán historicamente foron un espazo ideal para facer comunidade e propiciar a convivencia entre veciños e visitantes, achegando a cultura e o pensamento de forma accesible e interxeracional”.
O festival recupera a súa identidade orixinal e, aproveitando os recursos que ofrece a cidade de Compostela e a súa singularidade patrimonial, pretende devolver á cidadanía unha proposta curatorial que non priorice a novidade e a competición senón o intercambio entre a comunidade creadora e a veciñanza.
Na pasada edición escoitábamos as consideracións do director de Curtocircuíto, Pela del Álamo. No seguinte enlace podedes volver a escoitalas https://lindeiros.net/compostela-coversa-pela-del-alamo-curtocircuito/
O festival manterá unha programación internacional e interdisciplinar que seguirá tendo o cinema como eixo principal. Ademais de manter as seccións competitivas Planeta GZ, Supernova e Cosmos, o encontro e convivencia entre artistas, cineastas e público serán o punto de partida para xerar lugares de debate, reflexión e coexistencia co público fóra das estruturas competitivas.
O novo modelo de festival combinará a súa programación nas sedes habituais coa presenza no espazo público de Compostela. As prazas e as rúas da cidade servirán como anfiteatros naturais nunha aposta por devolver o espazo público á cidadanía e ofrecer alternativas á imaxe máis turística da capital galega.
Na súa próxima edición, as actividades de Curtocircuíto desenvolveranse en espazos xa coñecidos como o Auditorio de Galicia, Teatro Principal, a Facultade de Ciencias da Comunicación da USC ou a Facultade de Psicoloxía e emprazamentos históricos do festival como a praza da Quintana ou a praza de Praterías.
Curtocircuíto Campus
A formación e a presenza nos centros educativos da cidade segue sendo un dos acenos de identidade do festival, desde agora baixo o nome de Curtocircuíto Campus. Ata o 13 de maio desenvólvense actividades dedicadas en exclusiva á alfabetización audiovisual, a creación de novos públicos e a formación en xeral.
A programación, dirixida a público infantil, escolar, universitario e profesional, estará dividida nas seccións Teenage Riot e Criaturas, dedicadas á xeración de novos públicos e que contan co apoio de Deleite, e Satélite FÄCOM, en colaboración coa Facultade de Ciencias da Comunicación e o Club de Cinema FACOM.
Realizarase tamén a Cátedra Cruz Vermella – USC, na que se ampliará programación con respecto a edicións anteriores e que este ano estará centrada nos aspectos positivos do envellecemento. De novo levará a cabo a Residencia Artística, que conta co apoio da Universidade de Santiago e Cafés Candelas, e que, a través da fotografía, reivindica unha imaxe de Santiago de Compostela que contraste coas representacións tradicionais da cidade.
Ademais, nesta nova edición recuperarase a Sección Canteiras, que pon en valor a alfabetización audiovisual e promoción de prácticas que capacitan o estudantado para coñecer, interpretar e expresarse a través da creación audiovisual e a reflexión en torno á linguaxe visual.
