Acordo Para Aprobar Os Estatutos e Constituír a Entidade de Conservación Do Polígono Da Sionlla
Nunha reunión cos empresarios do Polígono da Sionlla acadouse un acordo para que o Concello aprobe os estatutos da entidade urbanística de conservación e esta poida ser constituída formalmente.
Un encontro entre responsables do concello de Santiago e empresarios do Polígono da Sionlla dou un paso cara unha entidade de conservación da área industrial e comercial. Por parte do goberno municipal participaron o concelleiro de Urbanismo, Vivenda e Cidade Histórica, Iago Lestegás, e o concelleiro de Vías e Obras, Xesús Domínguez, acompañados das directoras de área de Urbanismo e de Obras e Servizos Básicos, da xefa de sección de Xestión Urbanística e do xefe de servizo de Obras e Proxectos.
O polígono da Sionlla permanece sen a figura da entidade urbanística de conservación dende a recepción da obras no ano 2015, pese a que este organismo é obrigatorio de acordo co previsto no proxecto sectorial da Sionlla aprobado pola Xunta de Galicia en 2007.
O Concello escoitou as inquedanzas dos propietarios e explicou o marco legal e as actuacións que lle corresponden á administración local.
Como primeira medida o concello xa levaba unha proposta de estatutos que está na súa fase final de tramitación e que, como trasladou no encontro o concelleiro , está previsto que se aprobe nos vindeiros meses. Unha vez aprobados os estatutos, constituirase a entidade de conservación.
Paralelamente, os empresarios propietarios comprometéronse a aportar en breve unha diagnose orzamentada do estado actual de conservación do polígono e do que suporía as súa posta a punto. Segundo trasladaron no encontro, este documento está xa avanzado. Así as cousas, todas as partes, incluída Xestur acordaron volver reunirse para avaliar esta diagnose.
Na acta de recepción das obras de urbanización, asinada polo Concello de Santiago e por Xestur en abril de 2015, establécese o seguinte: “A recepción das obras determina a asunción pola entidade de conservación do parque empresarial da Sionlla do deber de conservación da urbanización, quedando en tanto non se constitúa, Xestión do Solo de Galicia Xestur S.A. como responsable da conservación da urbanización”.
Na súa condición de promotora da urbanización, Xestur asumiu o deber de conservala mentres non se constituíse a entidade de conservación. Non obstante, o Concello de Santiago vén asumindo, dende hai anos, a prestación dos servizos de alumeado público, saneamento e abastecemento de auga, limpeza viaria e recollida de residuos. O mantemento das luminarias, zonas verdes e mobiliario urbano realizouse por Xestur ata xuño de 2022, data en que decidiu deixar de facelo.
