Compostela, 20 de febreiro do 2023 – O Comité de empresa de Urbaser, concesionaria da recollida de lixo en Compostela, reclama medidas ao concello ante o mal funcionamento do servizo.
Os representantes dos traballadores de Urbaser denuncian que pasaron dez meses desde a adxudicación do novo contrato. Un período no aseguran que “o servizo vai a peor”. O Comité explica que a empresa segue sen cubrir as baixas dos laborais e sen se renovar a maquinaria.
Estas dúas deficiencias supoñen, segundo o Comité, que “40.000 as toneladas de lixo pasaron por unha maquinaria máis que envellecida. A empresa está usando camións doutras contratas que non compren coas medidas de seguridade”.
O Comité denuncia ademais unha subcontratación do servizo “quita e pon”. Aseguran que esta práctica xa era común en Urbaser e agora “acaba de subcontratalo a outra empresa empeorando as condicións das persoas traballadoras que prestan ese servizo”. Os representantes laborais lembran que “non se poden subcontratar servizos dentro dun mesmo servizo buscando con iso o aumento dos beneficios empresariais a conta de empeorar as condicións do persoal”.
Xunto a isto, denuncian o incumprimento do convenio. Neste sentido, explica que a concesionaria “pretende contratar persoal a tempo parcial para realizar os servizos de domingos precarizando aínda máis as condicións do persoal”. Unha situación fronte a que afirma que a empresa “ten que contratar máis xente a xornada completa para poder atender eses traballos e así cubrir as baixas e libranzas dos compañeiros e compañeiras”.
Un servizo auditado mensualmente
Desde o concello o alcalde, Xosé Sánchez Bugallo, recoñece que hai material novo que aínda non chegou pero lembra que se trata dun servizo que está sendo auditado constantemente e que se emiten informes mensuais.
Desde o Comité advírtese de que se non se corrixe a situación “iniciarán mobilizacións nas vindeiras datas, tanto para denunciar publicamente o empeoramento do servizo, como as condicións laborais do persoal que traballa para este servizo e as novas subcontratacións realizadas pola empresa Urbaser”. O comité non descarta mesmo ir á folga no mes de maio, se a situación persiste.
