Compostela, 14 de febreiro do 2024 – Santiago(é)Tapas comeza este xoves en Compostela con 40 locais participantes e 61 tapas que se poderán degustar ata o 3 de marzo.
Santiago(é)tapas celébrase este ano por primeira vez no mes de febreiro, logo de que a Asociación Hostelería Compostela solicitase a Turismo de Santiago o cambio de datas. Os bares e restaurantes teñen agora unha actividade en novembro que confirma a desestacionalización do turismo na cidade.
O cambio de datas recibiu o apoio dos negocios de hostalería xa que o número de locais participantes e maior que que na edición de novembro de 2022 e pasan de 36 a 40. En total, poderanse degustar 61 tapas, 29 creativas e 32 tradicionais, nos 40 locais distribuídos en 5 rutas ou (é)tapas diferentes.
Dende Turismo de Santiago estase facendo un esforzo especial para ofrecer máis e mellores agasallos ás persoas que cubran algunha ruta do concurso co obxectivo de incentivar a participación nun mes de plena tempada baixa. Así, ofreceranse máis de 200 agasallos para aquelas persoas que cubran algunha das rutas definidas no Tapasporte.
Entre os agasallos inclúense produtos gastronómicos, como Piedras de Santiago; botellas de viño, queixos, meles e packs de produtos gastronómicos; entradas para espectáculos, festivais e o Museo da Cervexa (Mega); masaxes e agasallos de saúde e benestar; noites de hotel; ceas e xantares “experiencia” e abonos para o Obradoiro CAB. Mesmo exemplares asinados do libro “O home que matou a Antía Morgade”, de Arantza Portabales, no que Santiago de Compostela e os seus establecementos de restauración teñen unha destacada presenza. Todos os agasallos e as rutas que é preciso facer para conseguilos poden consultarse en santiagoetapas.gal.
O Tapasporte, que nesta edición recupera o seu formato de libriño, recolle toda a información das tapas e dos bares e restaurantes do concurso, e sirve ademais para selar as rutas que se van completando e que dan dereito a recibir os agasallos. Os Tapasportes poden recollerse na Oficina de Turismo, na rúa do Vilar, en horario de 10.00 a 18.00 h, na sede da Asociación Hostelería Compostela e nos establecementos participantes.
Ademais, este ano haberá tres rutas especiais: unha sen glute, na que se inclúen 19 petiscos; outra vexetariana con 11 propostas; e unha doce, novidade desta edición, composta por 15 tapas.
O concurso, organizado por Turismo de Santiago, en coordinación coa Asociación Hostelería Compostela, conta co apoio da Deputación da Coruña, o patrocinio de Estrella Galicia e a colaboración de Cash Record e Café Dromedario, entre outras empresas e entidades.
