Compostela, 11 de xaneiro do 2024 – “12 comercios, 12 sensibilidades” une en Compostela a comercios da cidade con proxectos solidarios que traballan desde Santiago.
A iniciativa permitirá tamén favorecer o fluxo de clientela entre pequenos comercios de diferentes puntos da cidade e dedicados a distintos sectores. O programa conta coa colaboración da Concellaría de Dereitos e Servizos Sociais, Promoción Económica e Xuventude.
A campaña “12 Comercios, 12 Sensibilidades” foi presentada no concello de Santiago. Xunato a concelleira María Rozas participou a coordinadora do proxecto, Carmen Díaz. Rozas dixo que a iniciativa “fainos sentir orgullo polo noso tecido comercial, que nos ratifica en que os pequenos establecementos son os que contribúen a facer cidade, e que demostra a súa vocación social e innovadora”.
Pola súa banda, Carmen Díaz puxo en valor a colaboración entre as doce comerciantes, todas mulleres, que xurdiu a partir dun curso de formación no que participaron todas elas. Tal e como explicou, cada comerciante elixiu a entidade solidaria coa que se sentía máis identificada “para difundir o seu traballo e establecer vías de cooperación”.
A través de “12 Comercios, 12 Sensibilidades”, doce establecementos de Santiago darán a coñecer outras tantas entidades sociais e solidarias ao longo de todo o ano. Cada mes, a iniciativa será protagonizada por un comercio, que difundirá o labor dunha entidade concreta a través de actividades como exposicións, charlas ou obradoiros. Os once comercios restantes informarán da causa, para darlle máis visibilidade e favorecer o fluxo de clientela.
O programa comeza neste mes coa tenda online de artesanía e antigüidades Águila Atlántica, que dará a coñecer o traballo da Fundación Pictoaplicaciones, un proxecto solidario do Grupo Promedia orientado a persoas con Trastorno do Espectro Autista ou con outro tipo de trastornos na comunicación e linguaxe oral.
