Compostela, 6 de setembro do 2023 – O Centro Singular de Investigación en Tecnoloxías Intelixentes da USC, o CITIUS, organizará o vindeiro ano o congreso máis importante de Europa en intelixencia artificial.
O congreso ECAI cumpre cincuenta anos, o primeiro encontro celebrouse no Reino Unido en 1974, e celebrarase en Compostela. O CiTIUS da USC acolle esta semana as reunións de lanzamento coas que arrinca a conta atrás para a celebración en outubro de 2024.
A Asociación Europea de Intelixencia Artificial (EurAI) realiza un encargo único xa que, ao elixir Santiago, repite por primeira vez una sede. O CITIUS será o responsable da organización por segunda vez en catro anos o que significa un recoñecemento ao éxito alcanzado na edición dixital ECAI 2020.
Hai dous anos a USC organizou un evento pioneiro na modalidade non presencial, creado en tempo récord pola pandemia da COVID-19, que contou con máis de 5.000 participantes de 120 países distintos, e no que se presentaron case 400 traballos de investigación.
Santiago volverá ser o epicentro da Intelixencia Artificial en outubro de 2024. Un momento de excepcional importancia, ao coincidir no tempo co medio século de vida do congreso (organizado por primeira vez en 1974 no Reino Unido), e a previsible próxima aprobación do Regulamento en IA da Unión Europea, a primeira lei deste tipo a nivel mundial.
Espérase que ECAI 2024 reúna a máis de 1.000 investigadores e investigadoras de todo o mundo, así como entidades, organizacións e empresas de ámbito global, que se darán cita no CITIUS para presentar e debater sobre os últimos avances científico-técnicos, o futuro da IA e as súas aplicacións.
O evento será un acontecemento de extraordinario interese económico e social, e está promovido pola Asociación Europea para a Intelixencia Artificial (EurAI), que confiou a súa organización ao persoal investigador da USC.
Podes saber máis do CITIUS na entrevista que lle fixemos ao seu director hai uns anos seguindo este enlace
Primeiros pasos
A organización do evento dá esta semana en Santiago os seus primeiros pasos coas visitas preliminares ás instalacións que albergarán o congreso e distintas reunións de lanzamento.
En este primeiro encontro participan os responsables de programa de ECAI 2024, Ulle Endriss (Universidade de Amsterdam, Países Baixos) e Francisco de Melo (Instituto Superior Técnico de Lisboa, Portugal); o responsable xeral da conferencia, Fredrik Heintz (Universidade de Linköping, Suecia); o presidente de EurAI, Carles Sierra (Institiuto de Investigación en IA, CSIC); e os presidentes do comité organizador, Senén Barro e Alberto Bugarín, os dous profesores da USC.
