clinico larga
Compostela, 10 de xaneiro do 2024 – Comisións Obreiras denuncia a “inoperancia” das salas de radioloxía do Complexo Hospitalario Universitario, CHUS, polas “constantes avarías duns equipos descatalogados”.
O sindicato explica que o equipamento de radioloxía ten abundantes avarias que repercuten directamente no tempo de atención aos doentes e na propia saúde dos profesionais.Actualmente existen dúas salas de raios nas Urxencias do CHUS, “pero dificilmente se poden encontrar en servizo as dúas o mesmo tempo pois case sempre algunha delas está avariada”.
Segundo CCOO as máquinas son “obsoletas” e reparadas con pezas doutros equipos. Deste xeito, co constante uso, “ao pouco volven estar estropeadas”. Alén destes problemas técnicos, as salas existentes “non se adaptan á tecnoloxía existente na actualidade”. Unha delas, por exemplo, “é das poucas analóxicas que quedan en Galicia” o que provoca en moitas ocasións que haxa que repetir as radiografías, “sometendo o doente a unha irradiación innecesaria e inxustificada”.
Desde a sección sindical de CCOO sinalan que hai case un ano, en marzo do 2023, os responsables da Xerencia da Área Sanitaria comprometéronse a renovar as máquinas, pero a día de hoxe “nada se sabe ao respecto”.
O sindicato insta a acometer canto antes a dita renovación, xa que esta situación ten repercusións tanto na saúde laboral do persoal sanitario, con constantes lesións musculares polo mal estado dos aparatos, como no desbordamento das Urxencias e os tempos de espera que deben padecer os doentes.
