Compostela, 21 de abril do 2023 – O Centro de Supercomputación de Galicia, CESGA, presenta hoxe un acordo de colaboración coa empresa Fujitsu para a creación dun centro cuántico en Santiago.
A firma do acordo entre o CESGA e Fujitsu ten como obxectivo a investigación e innovación en tecnoloxías Cuánticas. O convenio posibilitará a creación do Quantum Center de Fujitsu que terá a súa sede en Santiago de Compostela.
A dirección de este centro correrá a cargo tanto do CESGA como das Universidades Galegas e o Consello Superior de Investigacións Científicas (CSIC). No acto presentarase ademais o Computador Cuántico ofertado por Fujitsu, producido pola startup británica Oxford Quantum Circuits (OQC).
Este novo ordenador comezará a dar servizo no CESGA en setembro de 2023 e será o de maior número de cúbits que se instalará en España en 2023. A iniciativa forma parte do Polo de Tecnoloxías Cuánticas de Galicia, que aspira a investir nos próximos anos 154 millóns de euros e no que xa están en execución investimentos por máis de 30 millóns para contribuir á captación e retención de talento, con máis dunha trintena de empregos xerados.
Esta nova infraestrutura forma parte dos investimentos previstos no Polo de Tecnoloxías Cuánticas de Galicia, unha das iniciativas posta en marcha pola Xunta de Galicia como un dos proxectos estratéxicos da candidatura galega aos fondos Next Generation.
No acto participaran Lois Orosa, Director Centro de Supercomputación de Galicia (CESGA); Vivek Mahajan, Chief Technology Officer, Fujitsu Xapón; Gonzalo Romeo, Director de Produto, Fujitsu -España; Ilana Wisby, Chief Executive Officer e Socia Fundadora de Oxford Quantum Circuits) e Francisco Conde, Vicepresidente primeiro da Xunta de Galicia e Conselleiro de Economía, Industria e Innovación.
