Compostela, 16 de outubro do 2019 – O proxecto persoal de Xacobe Martínez ao marxe de Sumrra chega este xoves á Casa das Crechas en Compostela.
Son xa máis de medio cento de composicións as que atesoura Xacobe Martínez e unha boa parte delas poderanse escoitar este xoves a partir das nove da noite nas Crechas. Todo este material está publicado nas distintas entregas discográficas que o contrabaixista de Compostela foi deixando polo camiño ó longo destes últimos e fructíferos anos.
En formación de Trío, Cuarteto ou Quinteto, puxo a cara e o nome a unha forma de entender o Jazz que xurde dende o corazón e o peito, e que non coñece límites nin fai concesións. Xacobe Martínez Antelo continúa na senda da tradición xenuinamente jazzística con esta renovada formación a trío: saxo tenor, contrabaixo e batería, da man de Xosé Miguélez e Max Gómez. Jazz Galego de primeira liña, en libertade, e sen complexos…
Xacobe Martínez Antelo trío son: Xosé Miguélez no saxo tenor, Xacobe Martínez Antelo no contrabaixo e Max Gómez na batería
