Compostela, 12 de xaneiro do 2023 – A Semana Santa de Compostela xa ten cartel para a edición 2023, realizado en esta ocasión pola Confraría da Esperanza, creada no 2005 e con sede na Igrexa de Ánimas.
Tanto na Semana Santa 2022 como na do 2021, o deseño foi realizado pola propia Xunta de Confrarías, por tratarse dun dobre Ano Santo, un feito inédito. En eses cartéis estiveron representadas as doce confrarías da cidade. A Semana Santa 2023 celebrarase do 31 de marzo ao 9 de abril.
O cartel mostra a imaxe da Confraría, a Virxe da Esperanza, unha talla obra de Bernardino Mosquera que data do 1877. Restaurada en 2015 por Manuel Rodríguez Rocha grazas ao párroco de San Fructuoso. A Esperanza viste un traxe doado ao que se lle engadiron os bordados do traxe orixinal. Ademais, durante o seu tránsito pola cidade, leva consigo dous rosarios, un broche de ouro, un pano de encaixe de Camariñas e uns pendentes de ouro; abelorios que son prestados cada ano por un confrade.
Na imaxe do cartel, tamén se quixo facer unha referencia ás portadoras. Todas elas mulleres que comezaron de nenas na confraría e que, co paso dos anos, convertéronse nos pés e ollos da súa venerada imaxe.
O recentemente elixido presidente da Xunta de Confrarías, Luís Seoane, afirmaba na presentación a súa satisfacción porque fose esta Confraría a encargada de realizar o deseño xa que, “é unha das confrarías máis novas da nosa cidade e isto deixa de manifesto que a Semana Santa compostelá está en pleno auxe e conta cun importante respaldo que esperamos que continúe en alza”.
Luís Seoane aproveitou tamén a ocasión para anunciar que a Semana Santa de Santiago xa cumpre todos os requisitos para presentar a súa candidatura a Festa de Interese Turístico Nacional. Por iso adiantou que “durante os próximos meses ordenaremos e prepararemos toda a documentación necesaria de face a dar os pasos administrativos necesarios para solicitar o Interese Turístico Nacional”.