Compostela, 8 de novembro do 2023- Santiago presentou a súa campaña para o 25N, Día Internacional da Eliminación da Violencia Contra as Mulleres, que leva por lema “O teu machismo da noxo”.
A campaña de este ano busca impactar e facer reflexionar sobre os comportamentos e formas de violencia machistas; en especial nas redes sociais e no mundo do deporte. A iniciativa contra o machismo foi presentada pola alcaldesa de Santiago, Goretti Sanmartín, acompañada por Teresa Furelos, xefa de Servizo da Área de Acción Social, e de Pilar Abades e Sabela Iglesias, creativas na produtora Illa Bufarda, responsables da campaña.
A alcaldesa explicou que con esta campaña o Concello de Santiago quere transmitir a idea de que “a sociedade compostelá di non a todo tipo de violencia”, xa que se trata dunha sociedade que “está moi sensibilizada ao respecto das violencias de xénero e que non quere dar ningún paso atrás”.
A rexedora recalcou que se trata dunha iniciativa “valente” coa se pretende “non deixar indiferente a ninguén, se non xustamente provocar sensacións de desacougo, de inquedanza, de noxo e de rabia fronte a calquera tipo de violencia machista”.
A campaña desenvolverase desde dúas perspectivas, que se centrarán “por un lado, na violencia que as mulleres novas sofren nas RRSS ao respecto do seu corpo, as súas vidas e as súas decisións” e, por outro, “no mundo de deporte”, como un dos espazos nos que o Concello pode promover “non só a condena de todo tipo de machismo, senón tamén “unha reflexión sobre a idea de vivirmos en igualdade”, engadiu Goretti Sanmartín.
Para concienciar á cidadanía sobre os diferentes tipos de violencia machista, durante todo o mes de novembro difundiranse unha serie de mensaxes a través de carteis, vasos, manteis, bolsas… que serán empregados por todos os establecementos comerciais ou hostaleiros que se sumen á iniciativa, así como a través de imaxes nos autobuses urbanos e as marquesiñas, lonas despregadas en diferentes edificios emblemáticos e espazos deportivos ou proxeccións nalgunhas prazas da cidade.
Todo isto coa intención de “interrogar a todas as persoas que pasan pola rúa para que non cedamos e para dicir que seguimos avanzando en igualdade, sen dar nin un paso atrás”, subliñou a alcaldesa.
A campaña tamén se desenvolverá nas redes sociais do CIM (Facebook, Instagram e Tiktok) través de pílulas informativas que contaron coa participación de mulleres deportistas da cidade de diversas disciplinas, e se fará uso do cancelo #senprórroga. O 24 de novembro tamén terá lugar a lectura pública do manifesto.
