Compostela, 5 de decembro do 2024 – Os rapaces de 12 a 16 anos son moitas veces os esquecidos, non son cativos pero tampouco maiores. A concellería de xuventude de Compostela organiza por primeira vez este Nadal un campamento para eles coa intención de consolidalo nos vindeiros anos.
O obxectivo de Xuventude é “facilitar a conciliación das familias con fillos e fillas de máis de 12 anos”. A concelleira María Rozas explicou que “esta é unha franxa de idade para a que non adoita haber oferta nas vacacións, e é unha demanda, tamén, da propia rapazada”.
A actividade, que leva por nome “Este Nadal concilia no bosque dos artistas perdidos” vaise desenvolver no Monte do Gozo. A actividade ofrecerá “alternativas de ocio para os rapaces e rapazas, pero tamén facilitarlle a conciliación ás familias con fillos e fillas de máis de 12 anos que non queiran deixalos sós nas súas casas durante todo o período vacacional”
Rozas engade que “aínda que comezamos con esta experiencia no Nadal, o obxectivo é consolidar unha oferta de conciliación para a mocidade”. O programa deseñado “válese das diferentes expresións artísticas para propoñer actividades lúdicas nas que tamén se traballan cuestións como as relacións sociais ou a autoestima”.
Haberá actividades musicais da man da Casa do Rock, un taller de ficción sonora, outro de cianotipia, talleres de moda, e actividades lúdicas dirixidas por monitores e monitoras de tempo libre. Tamén está prevista unha acampada opcional, con pernocta, os días 27 e 28 de decembro.
O programa vaise desenvolver no Monte do Gozo nos días 23, 24, 26, 27, 28, 30 e 31 de decembro; e 2, 3, e 5 de xaneiro; en horario de 9.00 a 14.30 horas. Tamén haberá a posibilidade de adiantar a chegada e atrasar a saída se é preciso para facilitar a conciliación das familias, e darase a opción de almorzar e comer nas propias instalacións do Monte do Gozo.
As inscricións poderán facerse do 9 ao 18 de decembro no correo electrónico dptoxuventude@santiagodecompostela.gal; ou ben no teléfono 981 542 457. As 30 prazas dispoñibles (ampliables no caso de haber moita demanda) cubriranse por orde de inscrición. Os irmáns terán que facer unha única solicitude.
