Compostela, 30 de outubro do 2024 – O Partido Popular de Santiago denuncia que as luminarias do Campus Sur foron cambiadas sen a autorización da Comisión do casco histórico.
Dita Comisión ten unha subcomisión técnica que se encarga de avaliar a protección do patrimonio e no caso das luminarias do Campus Sur denegou o permiso segundo denunciou onte o concelleiro popular José Constenla nunha rolda de prensa.
O máis curioso do caso é que as luminarias anteriores estaban, en teoría, protexidas como elementos patrimoniais, Formaban parte do espazo que se coñecía como “A residencia” en donde están os edificios dos colexios maiores, o estanque e tamén as luminarias.
O popular preguntouse cal foi o motivo polo que os nacionalistas ignoraron un ditame unánime e desfavorable sobre a substitución deses 130 puntos de luz sobre columnas; e cal foi a causa que lles levou a urxir dito cambio, “nós preguntámonos, remarcou, que mudou nunha normativa que leva en vigor dende o 2015, data dende a que o Concello asume o mantemento de ditas luminarias”.
Están protexidas as luminarias substituídas?
Constenla explicou que lles sorprende que “o concelleiro de Obras afirme que non lle consta, con certeza, a catalogación das luminarias retiradas, polo que lle pedimos que o aclaren, posto que en máis de ano e medio tiveron tempo máis que suficiente para indagalo”.
O certo é que as luminarias substituídas non son tampouco as orixinais. Arredor do ano 2000 a Universidade cambiou as iniciais, en pedra, por unha replica en formigón que son as que agora cambiáronse. O concelleiro popular recoñece que a USC tampouco sabe dicir onde están as orixinaís.
O edil popular dixo que “A realidade é que a Comisión informou desfavorablemente, por unanimidade e tras un informe técnico municipal que establece que non se poden substituír estes elementos luminosos; e o BNG fixo o que lle deu a gana e levou a cabo unha actuación que afectará notablemente á imaxe histórica deste ámbito protexido que rodea á cidade histórica, polo que debería ser obxecto dun proxecto de intervención para alumeado público que resolvera as graves deficiencias existentes na instalación actual, pero respectando os valores culturais da contorna”, remarcou.
O Psoe tamén ve un problema
Despois da rolda de prensa os socialistas sacaban unha nota de prensa no mesmo sentido. A concelleira Mercedes Rosón afondaba nas recomendacións dos expertos “tanto o persoal técnico da comisión como do propio arquitecto municipal, pasaría porque se realizara un proxecto de alumeado público específico para todo o Campus Vida que permitise resolver as deficiencias existentes en materia de seguridade pero ofrecendo unha solución coherente coa imaxe da contorna”.
A iniciativa socialista contempla que se puideran empregar dous modelos de luminarias, en función das zonas do Campus nas que se localizaran, diferenciando a correspondente co trazado da antiga Residencia Universitaria de Jenaro de la Fuente, onde tamén se atopan a maioría dos edificios catalogados do ámbito e na que, polo tanto, existe un maior valor patrimonial; do resto do Campus, caracterizado pola presenza de edificios contemporáneos.
