Compostela, 22 de xuño do 2023 – A compañía ButacaZero traballa na estrea de “Iribarme”, unha peza sobre a figura de Manuel Fraga que se estreará en outubro en Madrid.
“Iribarne” é unha obra escrita por Esther F. Carrodeguas e dirixida por Xavier Castiñeira. O traballo coproducido polo Centro Dramático Nacional é definido por ButacaZero como unha investigación escénica. Mónica García, Xurxo Cortázar, Anxo Outumuro, Lidia Veiga, Jorge Arcos e a propia Carrodeguas conforman o elenco dunha peza cuxo espazo sonoro e “temazos” musicais serán de Berto e na que Sabela Domínguez asina a coreografía
A peza estrearase no CDN o Día da Hispanidade e en xaneiro do 2024 comezará a xira por Galicia. A peza percorre a vida de Manuel Fraga Iribarne coa intención de entender non só a súa figura, senón descubrir as implicacións que tivo -e segue a ter no noso presente.
“Iribarne”, explican Carrodeguas e Castiñeira, “Non é exactamente un biopic, pois non collía nunha soa obra”, pero si que remata por ser un “paseo pola transición camiñando a carón dun personaxe secundario pero absolutamente imprescindible da mesma. É un intento irreverente por comprender como chegamos ata aquí da man dun político que, nas súas propias palabras, dicía as verdades sen condón”, apuntan os creadores.
A investigación comezou en xaneiro de 2022, ano no que se celebrou o centenario do nacemento e os dez anos do pasamento de Fraga Iribarne, a través do contacto con persoas que o trataran , ademais da gravación de entrevistas a diferentes figuras do eido político e social.
“Abordar un personaxe tan popular coma Manuel Fraga, que tiña deixado a súa pegada en case todos os eventos e celebracións de Galicia, tiña que facerse coa colaboración de quen albergaba memoria directa sobre el”, expoñen os directores da plataforma creativa galega. Así, desde ButacaZero, iniciaron un proceso de recollida de información, que derivou nunha residencia creativa no Pazo de Mariñán (onde Fraga empezou a deseñar a súa retirada política), ademais do seu paso polo itinerario Cruzamentos do proxecto Camiño Escena Norte e por outra residencia creativa na Sala Beckett de Barcelona.
Hoxe ademais estreouse a canción ‘WHO THE F*CK IS IRIBARNE?’ o primeiro dos “temazos” creados polo produtor musical Berto (Verto, Fillas de Cassandra, Mondra, Nia twee, Ash Diz e cantante e guitarrista no seu propio grupo, nomeado Berto) que conformarán a banda sonora de “Iribarne”.
