Compostela, 31 de maio do 2023 – O BNG comeza as negociacións para formar o novo goberno de Santiago confiando en poder incorporar a Psoe e Compostela Aberta.
Goretti Sanmartín e os concelleiros electos do seu grupo daban onte unha rolda de prensa para presentar as liñas xerais do que será o novo goberno municipal da cidade. Ao mesmo tempo realizaron unha valoración dos resultados do pasado domingo.
As intencións de Sanmartín e conseguir un goberno “amplo, estable e sólido”. En todo momento insistiu na importancia de que sexa un goberno diverso, facendo referencia a importancia de incorporar tanto aos socialistas como a Compostela Aberta. Unha proposta que se atopa coa primeira pedra: a crise no grupo socialista que quedará en mans dunha xestora.
Goretti Sanmartín non parece que teña problemas para formar goberno pese a insistencia do Partido Popular en negociar co Psoe. Si ese goberno será en minoría, coa posible incorporación de Compostela Aberta, ou con unha maioría ampla é que está por decidir.
Goretti Sanmartín presentou o novo grupo municipal do BNG que estará conformado por Míriam Louzao, Xesús Domínguez, Pilar Lueiro, Manuel César e Iago Lestegás na próxima Corporación municipal. A futura alcaldesa dixo que “As seis persoas que conformamos o grupo municipal imos deixar a pel por traballar por Santiago, por constituír o mellor dos gobernos e comezar a traballar desde o minuto 1 para abrir un novo tempo, porque iso é xustamente o que dixeron as veciñas e veciños de Santiago”.
Sanmartín afirmou que quere comezar a negociación cos outros dous grupos da esquerda que conseguiron representación na Corporación municipal, para iniciar “un proceso rápido e intenso que debe culminar o 17 de xuño, cando se constitúa a nova Corporación e se escolla a Alcaldía de Santiago de Compostela”.
Anunciou que xa convocou unha primeira reunión cos dous grupos, para o xoves 1 de xuño co PSOE e para o venres 2 de xuño con CA, porque quere facer “un proceso de negociación transparente”.
A encrucillada socialista
A marcha de Sánchez Bugallo da secretaría xeral deixa ao partido nunha encrucillada. A xestora terá que decidir ao novo líder socialista en Santiago pero tamén negociar co BNG a incorporación, ou non, ao novo goberno.
Hai cinco anos o actual concelleiro en funcións Sindo Guinarte estaba disposto a competir nunhas primarias por liderar o partido. Esa proposta rematou cun acordo que levou a Sánchez Bugallo a presentarse ás eleccións do 2019. A incógnita é si nas actuais circunstancias estará disposto a retomar aquela idea.
Ao mesmo tempo os afiliados miran á actual número 1 no concello, despois da marcha de Bugallo, Mercedes Rosón. Ao mesmo tempo algúns medios de comunicación poñen o foco sobre Xaquín Fernández Leiceaga, número 3 na candidatura de Bugallo.
O Psoe chega tarde a unha renovación pola que pasaron antes das eleccións PP, BNG e Compostela Aberta. Os resultado poden ademais condicionar a participación da agrupación socialista de Santiago en institucións como a Deputación ante os bos resultados obtidos en outros concellos que previsiblemente reclamarán o seu lugar.