Compostela, 14 de abril do 2023 – O BNG de Compostela aposta tamén polo derrubo da vella Casa da Xuventudee propón substituíla por unha praza cuberta que de paso a Belvís.
O proxecto nacionalista denominado “Pórtico de Belvís” eliminaría o edifico da vella Casa da Xuventude crearía un espazo cuberto de 600 m2 . Os laterais de esta praza cubrirían as traseiras da Rúa de San Pedro e terían espazos para gardar material como mesas ou sillas.
A idea foi presentada pola candidata do BNG, Goretti Sanmartín, acompañada de Iago Lestegás, arquitecto, e Alexandre Garrido, integrantes da candidatura. O BNG explica que se trata dunha proposta menos custosa e que reúne “os intereses dos colectivos, da veciñanza, de accesibilidade, de cumprimento das normas ambientais, de integración paisaxística e coidado arquitectónico”.
Segundo explicou o arquitecto Iago Lestegás, esta proposta formúlase con cinco obxectivos: “mellorar a imaxe urbana da praza do Matadoiro e do parque de Belvís; crear unha conexión accesible para todas as persoas entre o parque e a súa contorna; liberar de obstáculos a zona de servidume do rego do Cancelón; restaurar esta canle recuperándoo para desfrute da cidadanía; e crear un espazo aberto cuberto de carácter permanente que poida albergar encontros e eventos cando chove ou vai moita calor”.
Pola súa parte, Alexandre Garrido, como activista que fixo uso da Casa da Xuventudedurante anos con distintos colectivos, considera que esta proposta do Pórtico de Belvís do BNG “garante o uso para asembleas e actos públicos, combinada coa procura dun local céntrico para o asociacionismo, ademais de permitir abrir Belvís e de mellorar a mobilidade e a accesibilidade”.
Goretti Sanmartín tamén trasladou a posición do BNG sobre a cesión da Casa da Xuventudeá Deputación. O consideran unha incoherencia cando o concello ten alugados locais para os seus usos, tendo estes en propiedade. Avanzou ademais que “Se o Goberno local non dá marcha atrás, a Deputación tramitará de xeito ordinario este expediente, como se fai en todos os casos, mais o BNG de Compostela paralizará este acordo tras o 28 de maio e desenvolverá a proposta do Pórtico de Belvís”.
Sanmartín lembrou que a Deputación só tramita para o concello a recadación das multas en Executiva e polo tanto centrar na Casa da Xuventude esa xestión “atraería tráfico ao centro de Compostela, xustamente a un lugar en que hai que intervir para reducir a súa densidade”.
O BNG engade ademais que o proxecto socialista “recibiu un informe de Patrimonio do Concello onde se di que a Deputación debería financiar o 100% da obra e que non está xustificada a cesión a 25 anos, un espazo temporal innecesario para amortizar a operación”.
