Bisbarra, 10 de abril do 2023 – O Delas Fest volve un ano máis e encherá varios concellos da bisbarra de actividades e catro novos murais converténdose no principal festival de arte urbana con perspectiva de xénero.
As artistas Eloise Gillow, Amaia Arrazola, Julieta XLF e Doa Oa serán as encargadas en esta edición de realizar os murais. O Delas Fest contará ademais, como todos os anos, con obradoiros para familias, roteiros, coloquios e proxeccións, entre outras actividades.
O Delas Fest foi presentado a pasada semana no Pazo de Raxoi, en Compostela, coa presenza da concelleira de Acción Cultural, Mercedes Rosón; as concelleiras de Cultura e Igualdade de Teo, María López; e de Patrimonio e Turismo de Brión, Yolanda Bouzas; e Clara R. Cordeiro, socia de 7H Cooperativa Cultural.
O festival amplíase en tempo para incidir na presenza das artistas e dar visibilidade o maior tempo posible. Desde marzo, momento da convocatoria de muros, ata setembro cando se realizarán os murais, desenvolveranse as distintas actividades.
De destacar que nos meses de xuño e xullo, o Delas Fest concentrará a súa actividade en Compostela, cunha xuntanza entre as artistas convidadas e a veciñanza, un roteiro feminista de arte urbana e celebración do FAMILIA DELAS FEST!
O proxecto está organizado por 7H Cooperativa Cultural desde o ano 2019. Participan na actualidade os concellos de Santiago, Ames, Teo e Brión, Conta coa liña de subvencións da Deputación da Coruña e o patrocinio de Montana Colors, Ibersa-El Mundo del Pintor e Gadis, así como á colaboración de Cafés Candelas, Daveiga e LoxamHune.
Na rolda de prensa, Mercedes Rosón salientou a importancia deste proxecto xa que “integra a perspectiva de xénero, tan necesaria neste momento, e tamén nos achega disciplinas artísticas en auxe pero aínda moi descoñecidas, máis cando as creadoras son mulleres”.
O cartel desta edición incorpora no seu deseño á ilustradora María Montes (Pontevedra, 1987) quen, co seu característico e minucioso traballo, amosa unha persoal reinterpretación do espírito do festival, continuando a labor iniciada co cartel da edición anterior pola tamén ilustradora Maru Astray.
Este ano, as encargadas de realizar as obras de gran formato son a muralista e ilustradora vasca Amaia Arrazola (Gasteiz, 1984), quen pintará no Concello de Brión; a artista visual e muralista galega Doa Oa (Sober, 1986), quen creará no Concello de Teo, a muralista e artista visual británica Eloise Gillow (Oxford, 1993), quen levará a arte urbana ao Concello de Santiago; e a ilustradora e muralista valenciana Julieta Silla (Valencia, 1982), conocida artísticamente como Julieta XLF, quen creará a súa peza no Concello de Ames.
Para definir as temáticas e enfoques das súas obras, as convidadas contarán desde o mes de abril coa colaboración da comunidade, que volverá ter un rol destacado nos procesos creativos. A través da convocatoria Anfitriónate!, a veciñanza ten a oportunidade de coñecer ás artistas e de trasladarlles información, coñecementos e vivencias que inspiren as súas intervencións, converténdoas en reflexo da identidade e a idiosincrasia do territorio que as acolle.
De forma paralela a todo este traballo, o festival complétase cunha ampla variedade de actividades que arrancan o vindeiro martes 25 de abril ás 16.30h coa proxección, no Auditorio da Casa da Cultura do Milladoiro, do documental Museo a Ceo Aberto e o posterior coloquio coa súa directora, Marián Fernández, da cooperativa O Cable Inglés.
Nos próximos meses, tamén se celebrarán dous roteiros de descuberta da arte urbana feminista, un no Concello de Brión o sábado 6 de maio e outro no Concello de Santiago durante o mes de xuño. Tamén en Compostela, realizarase un coloquio en torno ao libro Cando elas toman os muros. Feminismo e arte urbana en Galicia, estudo pioneiro que constrúe unha primeira xenealoxía feminista da arte urbana.