A Real Filharmonía de Galicia actúa en Galeras e Conxo como parte da súa programación estival
A Real Filharmonía de Galicia ofrece esta semana dous concertos en colaboración coa Escola de Altos Estudos Musicais. Trátase dun compromiso da RFG coa formación de novos músicos profesionais e que, ademais, busca achegar a música clásica á cidadanía ao promover espazos de intercambio accesibles aos máis variados públicos.
Xunto á orquestra actuarán os alumnos Óscar Rial (trompeta), Erika García (clarinete), Inês Fernando (viola) e Belén Aragunde (frauta). O director asistente da RFG, Sebastian Zinca, levará a batuta
O acceso será libre e de balde ata completar a capacidade permitida e serán interpretadas composicións de Mozart, Haydn, Mendelssohn, entre outros. Os espectáculos terán lugar o xoves, 12 de xuño, na Casa das Máquinas (Galeras) e tamén o venres, 13 de xuño, na Igrexa de Nosa Señora da Mercé de Conxo; ambos ás 19:30h.
A vindeira semana, o xoves 19 de xuño, terá lugar no Auditorio de Galicia, ás 20:30h, o concerto de presentación da temporada 2025-2026. Será necesario retirar previamente as invitacións na web de Compostela Cultura e, na ocasión, o director titular e artístico Baldur Brönnimann dará a coñecer as principais propostas musicais preparadas para o próximo ciclo.
