Compostela, 3 de marzo do 2025 – O goberno municipal de Santiago de Compostela ven de aprobar a contratación das obras do “Barrio Verde de Pontepedriña” incluído no proxecto “Entre Sar e Sarela”.
O aprobado en Xunta de Goberno suporá a reurbanización do barrio verde de Pontepedriña a través da renaturalización da mazá e da creación dun corredor ecolóxico urbano cun orzamento base de licitación de 1.922.386,59 euros.
O ámbito de actuación en Compostela é o barrio de Pontepedriña entre a rúa do escultor Camilo Otero, a praza Pintor Laxeiro e a rúa Amor Ruibal, cunha elevada porcentaxe de espazo público destinado ao tráfico rodado.
O proxecto “Entre Sar e Sarela” está financiado ao 95% pola Unión Europea, polo que o importe total a percibir polo Concello de Santiago ascende á cantidade de 3.228.069,12 euros (1.596.722,49 euros para o ano 2024 e 2.480.945,93 euros para o ano 2025) e terá unha duración estimada de 28 meses, finalizando o 31 de decembro de 2025.
Ademais do “Barrio Verde de Pontepedriña”, o proxecto recolle outras catro actuacións: a “Naturalización da lagoa do Auditorio de Galicia, restauración fluvial do Río Corgo e mellora ecolóxica”, cun investimento estimado de 816.494,25 euros, sen IVE; a consolidación do Anel Verde exterior e a “Restauración ambiental e creación do laboratorio vivo-urbano agroecolóxico no xardín botánico”, e a “Recualificación e recuperación ambiental da área verde do barrio de Cornes”, que contaría cun orzamento estimado de 225.724,37 euros.
