Compostela, 18 de setembro do 2023 – O concello de Santiago aposta polos barrios da cidade coa posta en marcha da iniciativa de dinamización “Vitamina B de Barrio”.
Un proxecto que parte da Concellaría de Dereitos e Servizos Sociais, Promoción Económica e Xuventude que busca impulsar as competencias emprendedoras nos barrios da cidade. O proxecto forma parte da Estratexia de Desenvolvemento Urbano Sostible, EDUSI, Revive Santiago.
A iniciativa ten como finalidade identificar e apoiar o lanzamento de novos proxectos na cidade. Trátase de mellorar as competencias claves para emprender, mellorar as empresas e a procura activa do emprego. As distintas liñas están dirixidas a persoas emprendedoras, a comerciantes en activo que queiran mellorar os seus negocios, e á cidadanía en xeral.
Os primeiros barrios que acolleran “Vitamina B de Barrio” serán a Peregrina, San Lázaro, Santa Marta e Sar, a través de diferentes accións formativas e de concienciación, que se poden consultar na web vitaminabe.com. Na mesma páxina están xa habilitados os formularios de inscrición nas actividades.
Cursos
A primeira das accións denomínase “Emprende no teu barrio/Mellora o comercio do teu barrio” e tratará cuestións como estratexia, mercadotecnia, finanzas ou comunicación. Será unha semana de aulas, en horario de mañá, en cada un dos catro barrios implicados no proxecto, que irán acompañadas de titorías personalizadas para os participantes. A acción arrancará hoxe en Sar.
A segunda das propostas tamén de carácter formativo e de orientación profesional será “O talento do noso barrio”, dirixida á veciñanza dos catro barrios implicados no programa. Neste caso, as aulas impartiranse polas tardes, tamén ao longo dunha semana en cada unha das zonas, e tamén se completarán con titorías personalizadas.
“Barriohub” é a terceira das accións do “Vitamina B de Barrio”. Neste caso, elaboraranse unha serie de 20 pilulas de formación, de temáticas moi diferentes, como xestión do tempo, traballo en equipo, resolución de conflitos, ou xestión dos custos e dos ingresos, que estarán ao dispor da cidadanía dos barrios para ampliar a súa capacitación con independencia das súas dispoñibilidades horarias.
Participación e concienciación
O programa inclúe tamén a acción “Experiencia do teu barrio”, que prevé a celebración, xa no mes de outubro, de cinco foros de opinión en cada un dos barrios participantes, para que sexan as propias empresas e comerciantes as que compartan as súas experiencias. Nestes encontros abordaranse temáticas como o emprendemento, a sustentabilidade, ou o fomento do consumo de proximidade.
Por último, prevense accións nos centros socioculturais e educativos de Sar, Santa Marta, San Lázaro e A Peregrina, baixo o nome “Conciencia de barrio”, para fomentar entre as familias o consumo de proximidade e responsable. Estas accións de concienciación completaranse ao longo do mes de outubro cunha campaña de animación ao consumo de proximidade nos barrios obxecto desta iniciativa.
