Unha conferencia que se centra na recuperación do Coro do Mestre Mateo e que será impartida por Francisco Prado-Vilar, profesor e investigador de Historia da USC.
Os Luns do Ateneo falan de pedra na vindeira sesión xa que o protagonista será o Coro do Mestre Mateo e a súa recuperación. Coma sempre na Rúa do Vilar 19, as oito da tarde. A charla en esta ocasión leva por título “O Coro do Mestre Mateo revelado: a recuperación dun monumento único”.
O relato será Francisco Prado-Vilar, Profesor de Historia da Arte da USC e Investigador Distinguido do CISPAC. Esta conferencia, que será presentada en colaboración co proxecto KosmoTech_1200, abordará os avances na recuperación do famoso Coro do Mestre Mateo.
A conferencia centrarase na historia do coro, que foi desmantelado no século XVII, deixando atrás un conxunto de fragmentos que, ata agora, resistían a súa completa reconstrución. Gracias ao proxecto KosmoTech_1200, que combina tecnoloxía avanzada e investigación histórico-artística, presentaranse avances inéditos, como a reconstrución 3D inmersiva de varios sitiais do coro, a anastilose de partes ausentes e a recreación das policromías.
Prado-Vilar tamén compartirá como este monumento foi esencial na historia da música, testemuñando a emerxencia da polifonía e a conexión coa lírica galega, vinculada a cóengos-trobadores como Osoiro Eanes e Adao Fernandes.
Francisco Prado-Vilar é Profesor de Historia da Arte na Universidade de Santiago de Compostela e Investigador Distinguido do CISPAC. Doutor pola Universidade de Harvard, Prado-Vilar desenvolveu unha destacada carreira académica e investigadora en universidades de renome internacional, como Princeton e Stanford.
Participou en proxectos de conservación do patrimonio, entre os que destaca a restauración do Pórtico da Gloria, e actualmente lidera o proxecto KosmoTech_1200, que busca recuperar o Coro do Mestre Mateo e o seu importante legado.
