Celebrarase entre o 8 e o 22 de outubro e contará con seis actividades complementarias. Trátase da VII edición do festival.
O Ateneo de Santiago presentou este xoves o VII Festival Ateneo Barroco, que terá lugar en Compostela entre o 8 e o 22. A programación, baixo o título “Instrumental #1”, propón seis concertos e unha ampla oferta de actividades paralelas arredor da música antiga.
O Presidente do Ateneo de Santiago, Francisco Candela, abriu o acto indicando o “esforzo organizativo importante” que supón para a entidade a organización deste Festival pero que se continúa levando a cabo porque “entendemos que é un Festival de Música Barroca que prestixia a cidade de Santiago, que complementa a súa imaxe como cidade barroca e que permite poñer á disposición dos cidadáns de Santiago unha alternativa musical distinta das que usualmente estamos acostumados”.
Candela salientou que por primeira vez este Festival ten un convenio de colaboración coa Quincena Musical de San Sebastián, así como “a facilidade para participar neste Festival por parte dos cidadáns, tendo prezos moi asequibles porque queremos chegar a todo o público”.
Neste senso, as entradas e abonos xa están dispoñibles na web oficial do festival: www.festivalateneobarroco.gal. O prezo do abono para os seis concertos ten un custo de 35 euros (máis gastos de xestión), cun prezo reducido de 25 euros para os menores de 30 anos posuidores do Carné Xove e para os socios do Ateneo. Así mesmo, pódense adquirir entradas individuais para cada un dos concertos por 10 euros, ou 8 euros no caso das tarifas reducidas.
Pola súa banda, o director artístico do Festival, José Víctor Carou, explicou o contido do mesmo, indicando que este ano se inicia un proxecto artístico bianual, onde “baixo o título Instrumental queremos resaltar o papel fundamental que os instrumentos teñen desempeñado neste repertorio”. Carou destacou que no Festival “imos ir descubrindo instrumentos con propostas moi orixinais como é a presenza da musette, un instrumento da familia das gaitas, que tivo moita difusión nos séculos XVII e XVIII e despois caeu no esquecemento, presentado por unha música moi nova, galega de Tui, como é Nadia Vázquez, que está a desenvolver unha carreira extraordinaria con moito compromiso con este instrumento”.
O festival abrirase o 8 de outubro no Teatro Principal coa Camerata Boccherini, liderada por Massimo Spadano e Paolo Grazzi, nun programa de sonatas e triosonatas do Barroco tardío. O día 10, tamén no Principal, Ars Atlántica, con Nadia Vázquez á musette, Anna Margules coas frautas de pico, Calia Álvarez na viola da gamba e Manuel Vilas coa súa arpa de dúas ordes, achegará un repertorio de danzas francesas na España barroca.
O Salón Teatro acollerá o 14 a homenaxe do clavecinista Kenneth Weiss a Wanda Landowska, pioneira na recuperación do clave. Xa o 17, a Igrexa da Universidade será escenario das Lamentacións de Delalande con María Espada e o Collegium Musicum Madrid.
O ciclo continuará o 21 co programa Les Charmantes Invasions da Capela Compostelana, centrado na influencia francesa, e pechará o 22 no Paraninfo da Universidade con Ars Lachrimae, un percorrido polos sons do laúde, a cargo de Enrike Solinis. Ademais, haberá actividades complementarias como unha conferencia de Beatriz Cancela, a proxección do documental The Quest for Tonewood, un club de lectura con obras de Harriet Constable e Helena Attlee, encontros cos artistas e o concerto de improvisación Fractais Sonoros do pianista Alejandro Vargas no Hostal dos Reis Católicos.
