Compostela, 29 de outubro do 2024 – A Asociación de Veciños FONSECA chama a atención sobre a degradación que sofre a cidade histórica pola proliferación das terrazas, as restricións da mobilidade e o aumento do tráfico de visitantes.
A directiva de Fonseca daba onte unha rolda de prensa na que o presidente da asociación, Roberto Almuíña, explicaba que “Padecemos dilacións crónicas que deberían resolverse sen demora outorgando o permiso de ocupación da vía pública ao tempo que se dá a licenza de obra”
Almuíña estivo acompañado polo vicepresidente, Xosé Baqueiro; e as vogais da entidade, Pastora Rivas e María José Lorenzo. No encontro cos medios expresaron a súa preocupación por temas como “o necesario impulso á rehabilitación, a mobilidade no casco histórico e a súa contorna, a Alameda ou a contaminación acústica nocturna na améndoa da cidade”.
Roberto Almuíña destacou a imaxe de portada do novo número da revista que editan, a gran nora de Compostela, “unha icónica atalaia” das festas da cidade que segundo a Asociación debe permanecer neste espazo sempre garantindo “a protección ambiental e patrimonial da carballeira de Santa Susana”.
O presidente sinalou que se debe actuar “con urxencia” na Alameda, pero con sentido común e respectando o sentir dos composteláns, a pesar de que engadiu que a entidade non concorda co avance do Plan Estratéxico da Alameda.
O presidente, no seu editorial, fai un diagnóstico da degradación que está a sufrir a cidade, “con terrazas que medran privatizando as rúas para o beneficio económico duns poucos; a limpeza que co novo contrato non fixo máis que empeorar; as restricións de mobilidade absurdas que só afectan aos veciños que son os que menos acceden cos seus vehículos á cidade histórica; o tráfico medra día a día, con ringleiras de visitantes que ninguén xestiona e atrancan rúas e prazas, o que mostra que non hai un modelo turístico definido que, en opinión da Asociación, debería ir cara o turismo de congresos e de eventos e non cara o modelo actual de camiña a Santiago”.
No caso da cidade histórica, puxo de manifesto a perda de poboación que continúa desde o ano 2000, rexistrando un descenso do 24 %, segundo se manifesta na revista cunha reportaxe sobre un traballo demográfico do compostelán Óscar Cobos, onde tamén se amosa o aumento do número de inmobles abandonados actualmente sumando 123 edificios en este estado. “O Concello debería actuar como mediador e intervir aplicando a lei”.
Outro punto moi importante é a rehabilitación. Roberto Almuíña lembrou que non se están a deseñar plans de rehabilitación coordinados e adaptados ás moi especiais circunstancias dunha cidade Patrimonio da Humanidade, coas restricións de protección patrimonial que conleva nin dialogando coa veciñanza.
“Na cidade histórica e no resto de Santiago padecemos dilacións crónicas debido á incapacidade xestora do Concello, que deberían resolverse sen demora outorgando o permiso de ocupación da vía pública ao tempo que se dá a licenza de obra, ambas outorgadas polo mesmo equipo”.
Roberto Almuíña fixo mención ao nacemento da Federación Galega de Loita contra a Contaminación Acústica (FEGACÚSTICA), onde actualmente se está a traballar no fortalecemento da relación entre asociacións, e no ámbito lexislativo para modificar a Orde da Xunta de Galicia de outubro de 2020 que rexe os horarios de peche dos locais de ocio nocturno e nas terrazas.
Solicitan a racionalización dos horarios e que se adapten aos que xa teñen no País Vasco, que é un pouco máis favorable. Sobre esta cuestión a Asociación manterá mañá unha reunión co Grupo Parlamentario Socialista de Galicia para presentarlle a proposta de FEGACÚSTICA.
