Compostela, 15 de febreiro do 2025 – O concello de Santiago colabora coa Rede Galega en Apoio ás Persoas Refuxiadas, por medio da Unidade de Atención ao Migrante, para traer a obra de teatro “As que limpan”.
Esta peza da compañía A Panadaría trata de “remexer consciencias a través do teatro”. “As que limpan” chegará ao Teatro Principal o próximo xoves, 20 de febreiro, con entrada de balde.
O evento foi presentado pola concelleira de Dereitos e Servizos Sociais, María Rozas, e en representación da Rede Galega en Apoio ás Persoas Refuxiadas participou Miguel Fernández.
“As que limpan” é unha sátira inspirada na loita organizada das camareiras de piso dos hoteis na defensa dos seus dereitos sociais e laborais. A montaxe trata de darlle visibilidade a estas mulleres, e aborda cuestións como a explotación laboral, as enfermidades físicas e psíquicas derivadas do traballo, e mesmo a problemática do turismo masivo.
María Rozas explicou que, segundo o informe do Mercado de Traballo de 2023, o 30% do persoal de limpeza de oficinas, hoteis e outros establecementos similares son persoas estranxeiras, con case 250.000 contratos no conxunto do Estado.
Rozas dixo que “é fundamental reflexionar sobre a situación destas persoas, a inmensa maioría mulleres, e máis ainda nestes momentos nos que se estenden os discursos do odio”.
Pola súa banda, Miguel Fernández explicou que con esta obra “celébrase o noveno aniversario da Rede Galega en Apoio ás Persoas Refuxiadas, que se constituiu durante a guerra de Siria como reacción á resposta europea de pechar as fronteiras a aquelas persoas refuxiadas”.
Agora, incidiu, a Rede segue traballando noutras situacións “como as que viven as persoas refuxiadas que chegaron a Santiago desde diferentes países africanos”.
Entrada de balde
A colaboración entre a UAMI e a Rede Galega en Apoio ás Persoas Refuxiadas é unha oportunidade para ver de balde unha obra que leva máis de dous anos sendo un éxito de público. As invitacións para asistir poderánse retirar os días 18 e 19 na Zona C, e o propio día 20 na billeteira do Teatro Principal.
“As que limpan” vén recibindo numerosos recoñecementos desde a súa estrea, en 2022. En 2023 foi a obra triunfadora nos Premios María Casares, e recibiu o galardón nas categorías de Mellor Espectáculo, Mellor Dirección, Mellor Texto Orixinal, e Mellor Actriz Protagonista para Noelia Castro. Tamén conseguiu o premio do público na Mostra Internacional de Ribadavia en 2023.
A Panadaría foi fundada en 2013 por Areta Bolado, Noelia Bolado e Ailén Kendelman. Nesta década veñen traballando en montaxes creativas cunha importante carga de reivindicación social e feminista.
