Bisbarra, Compostela, 30 decembro 2024 – Aínda queda unha semana pero co traballo que teñen os Reis Magos teñen que ser previsores e planificar con moito coidado os seus itinerarios.
En Lindeiros temos xa datos das visitas que farán a Compostela e Ames. Carrozas, paxes e un tempo moi medido para escoitar as peticións dos máis cativos. A chegada dos Reis Magos é unha festa na que nenos e maiores desfrutan por igual.
Ames
En Ames o traballo complícase pero para iso son Reis Magos e comezarán ademais o día 3. As súas maxestades visitarán o Milladoiro e Bertamiráns, e tamén farán as súas respectivas paradas polas zonas rurais do concello, ademais da tradicional cabalgata de reis o día 5 de xaneiro.
Como novidade deste ano, haberá un servizo de tren que percorrerá Milladoiro e Bertamiráns para que os máis pequenos poidan percorrer as vilas dun xeito diferente.
O programa comezará coas recepcións reais para os nenos e nenas de Ames os días 3 e 4 de xaneiro, tanto en Bertamiráns coma en Milladoiro. Nestas visitas, os máis pequenos poderán pedirlles os seus desexos ás Súas Maxestades. As recepcións faranse nos pavillóns municipais de ámbalas localidades; o venres 3 pola tarde de 17.00 a 19.30 horas e o sábado 4 pola mañá de 11.00 a 13.30 e pola tarde de 17.00 a 19.30 horas. As visitas terán un intervalo de 5 minutos por cada unidade familiar.
Para poder asistir, estableceuse un sistema de cita previa para evitar longas esperas. Deste xeito, as persoas interesadas poderán reservar a súa cita a través da Sede electrónica do Concello de Ames, seleccionando o día, hora e localidade á que se desexa asistir no apartado “Solicitar cita previa”.
Unha vez seleccionado, haberá que escoller a localidade á que se desexe ir (Recepción Reis Magos Pavillón de Bertamiráns ou Milladoiro), seleccionar o día de asistencia (3 ou 4 de xaneiro) e darlle a Ver dispoñibilidade. Aparecerán 4 opcións nun menú despregable para consultar se quedan ocos libres no horario que se desexe. Só se poderá pedir unha cita por cada unidade familiar e, ademais, a reserva inclúe o pase polos tres Reis Magos.
Por outra banda as Súas Maxestades percorrerán o domingo 5 todos os recunchos do concello, comezando polas parroquias do rural amesán. Iniciarán o seu percorrido pola Ameixenda e Cruxeiras ás 10.00, continuando por Augapesada ás 10.30, por Piñeiro e Covas ás 11.00, polos lugares de Tapia e Ortoño ás 11.30, por Lens ás 12.00, por Agrón e Bugallido ás 12.30, por Trasmonte á 13.00 e finalizando este percorrido en Biduído á 13.30.
Xa pola tarde, será a quenda das cabalgatas de Reis nos principais núcleos urbanos de Ames. As familias interesadas en apuntar aos seus rapaces e rapazas para participar aínda están a tempo de poder inscribirse. Só é preciso enviar o impreso de inscrición a través da Sede electrónica ou de xeito presencial nas oficinas do Milladoiro e Bertamiráns.
A primeira cabalgata será a do Milladoiro, de 17.00 a 18.00 horas. A comitiva real sairá da Igrexa de San Xosé, proseguirá pola rúa Agriños – Travesía do Porto – Rúa Pardiñeiros – Agro do Medio – Rúa de Abaixo – Raxoeira – Rúa Anxeriz – Rúa Cruxa – Avenida Rosalía de Castro – Agro do Medio – Rúa Agro da Madalena – Rúa Cereixos – Travesía do Porto, rematando no pavillón. Unha vez finalice o percorrido da cabalgata, o pavillón municipal abrirá as súas portas para dar comezo á Gran Festa de Reis para gozar de música e chocolate con rosca.
Na mesma liña, a cabalgata de Reis en Bertamiráns será de 19.00 a 20.00 horas, comezando o percorrido á altura da Nave Obras do Concello; a continuación proseguirán por Avenida da Maía – Rúa do Pedregal – Travesía do Pedregal – Avenida da Maía – Avenida da Peregrina ata rematar no pavillón. Unha vez remate a cabalgata, ao igual que no Milladoiro, haberá un fin de festa con música no pavillón municipal con chocolate e rosca para todos os asistentes.
Compostela
A Cabalgata dos Reis Magos en Compostela sairá o domingo 5 de xaneiro ás 17:30 horas desde a praza da Mercé de Conxo. A comitiva percorrerá as rúas da cidade ata chegar á praza do Obradoiro e ao Pazo de Raxoi onde a cativada poderá gozar do concerto de María Fumaça e unha chocolatada.
A comitiva percorrerá a avenida de Ferrol, cuxo último tramo será sen son e música para as persoas cunha sensibilidade especial, e cruzarán Romero Donallo para continuar Frei Rosendo Salvado ata a praza Roxa. Despois seguirán pola rúa de República do Salvador, rúa do Hórreo e rodearán a praza de Galicia para entrar na zona vella pola Porta Faxeira e seguir pola rúa do Vilar ata a praza do Obradoiro onde está previsto que sexan recibidos pola alcaldesa e por membros da Corporación municipal entre as 19 e as 19:30 horas.
A continuación dirixirán unhas palabras á cativada e pasarán ao Salón Vermello do Pazo de Raxoi para a tradicional recepción. En total, prevese a participación de 300 persoas no percorrido, das que arredor de 200 serán voluntarias, demostrando o forte compromiso e colaboración da rapazada de Compostela, unha das cousas que máis valoran Melchor, Gaspar e Baltasar.
O desfile contará coa participación de 8 compañías profesionais de Galiza e doutras partes de Europa, que desenvolverán espectáculos protagonizados por acrobacias, danza e música, engadindo un toque de maxia e talento nacional e internacional á celebración. De destacar é o traballo das escolas de danza de Compostela Mandala e Cancunquinqué, así como á colaboración de asociacións como Armatroulas e da Escola de Música, que participará coa súa sección de corneta.
A cabalgata estará composta por cinco carrozas: tres carrozas para os Reis Magos, que irán acompañadas polos seus paxes e heraldos reais; a carroza da Carteira Real, que levará a maxia das cartas escritas polos nenos e nenas de Compostela; e a gran novidade, a carroza da Boa Estrela, que abrirá o desfile iluminando o camiño con bos desexos para todas as persoas que se acheguen a vivir esta noite tan especial.
