Compostela, 25 de abril do 2023 – A xestora do Servizo de Axuda no Fogar, SAF, de Compostela ven de ser sancionado polo concello e ten sobre a mesa unha ameaza de folga en maio.
Si o SAF sempre fora necesario desde a pandemia converteuse nun servizo imprescindible. Ao mesmo tempo comezou a quedar patente en moitos concellos que non estaba ben pagado. En Lindeiros contamos moitos de estes casos e hai seis meses chegouse a convocar unha folga indefinida.
Cada concello tivo ao longo de este tempo situacións e solucións distintas para compensar os déficits que en moitos casos carrexaban as empresas concesionarias. Vedra conseguiu un aumento salarial do seis por cento e un sistema de pago de quilometraxe razoable. Silleda acabou por subrogar o servizo.
Agora o comité do SAF de Compostela non descarta iniciar mobilizacións e mesmo convocar folga en maio. A concesionaria ven de propoñer unha serie de cambios nas condicións que, a xuízo das traballadoras, empeora as condicións laborais.
Segundo explica Roberto Alonso, representante da CIG-Servizos, a empresa puxo sobre a mesa pasar ao persoal que traballa de luns a venres, a traballar de luns a domingo cos descansos regulamentarios.
No caso do persoal con xornada continua a empresa anunciou que pasarían a estar a quenda partida; en canto ao persoal con contratos a tempo parcial, presentou a proposta de aplicarlles unha redución de xornada do 25%.
Alonso indica que na propia memoria explicativa a empresa concesionaria do SAF insiste en varios apartados na responsabilidade do concello e das persoas usuarias pola súa “inflexibilidade” para mover os horarios da prestación de servizos. “Indicou ademais que, de se permitir esta flexibilidade, a empresa non tería que adoptar estas medidas”.
O representante da CIG entende que se trata dunha proposta inasumíbel porque supón “un empeoramento das condicións de traballo, especialmente para o persoal a tempo parcial que ten as condicións máis precarias e aínda propoñen reducirlle un 25% máis a súa xornada”.
Do mesmo xeito, a CIG-Servizos rexeita a proposta presentada para as traballadoras que están a tempo completo porque “partir horarios e ampliar a xornada de luns a domingo dificulta enormemente a conciliación familiar”.
Xunto a isto Alonso lembra que a empresa ten pendente ademais o incremento salarial de parte do IPC do ano 2021, tal e como recolle o convenio, que sería dun 3,4% xa que “ao final abonou o 3,1% máis o IPC do ano 2022, do 5,7 tras da intervención da Inspección de Traballo”.
Sancións desde o concello
Ao mesmo tempo a Xunta de Goberno Local de Santiago acordou impor unha penalidade de 6.000 euros a Servisar Servicios Sociales, S.L., que xestiona o SAF por incumprimento grave na execución do contrato.
O alcalde, Xosé Sánchez Bugallo, non quixo entrar nos feitos concretos polos que fora sancionada. Explicou ademais que ao ser unha concesión realizada hai menos de dous anos a empresa non pode solicitar cambios nas condicións do contrato.
A intención do concello é iniciar este mesmo ano unha nova concesión e non prorrogar por un terceiro ano. Explican tamén que mesmo no caso de que a concesión tivera máis de dous anos a empresa tería que demostrar o déficit económico no servizo.
