O concello de Santiago de Compostela ven de dar a coñecer os nomes dos homenaxeados na Alba de Compostela 2025: á Médica Charo Rúa, o Ferreiro Chago Martínez, a Cantareira Aurora de Freira e o Hostaleiro Suso Do Dezaseis
Aínda que comezou con polémica, un pouco artificial, na primeira edición a Alba de Compostela comeza a ser unha das citas do mes de xullo e unha oportunidade para poñer nome e cara a esa xente que leva anos construíndo Compostela.
En este caso os nomes aos que se renderá homenaxe na Alba de Compostela son os da médica Charo Rúa, o ferreiro Chago Martínez, a cantareira Aurora de Freira e o hostaleiro Suso do Dezaseis
O Consello Asesor de Condecoracións aprobou por unanimidade as catro distincións coa Alba de Compostela 2025 atendendo ás respectivas traxectorias profesionais e persoais das persoas elixidas, mais tamén ao seu arraigo social e a súa relevancia nos distintos ámbitos que representan.
As catro persoas distinguidas son referentes no eido da sanidade, dos oficios tradicionais, da transmisión da poesía popular oral e da hostalería, e todas teñen unha fonda vinculación con Compostela ben a través da súa actividade profesional ou da súa traxectoria persoal.
Distincións Alba de Compostela 2025
Rosario García Rúa, máis coñecida como Charo Rúa, esta considerada a médica de helicóptero decana do Estado español. Desenvolveu a súa actividade no eido da sanidade durante máis de catro décadas, traballando como médica no helicóptero do 061 durante 34 anos. Tamén destaca no mundo da docencia e da divulgación especializada dirixida a profesionais do eido sanitario, das forzas de seguridade e de entidades de voluntariado.
Santiago Martínez Otero, coñecido como ‘Chago’, é un mestre ferreiro especializado en forxa de construción e na súa restauración, e que desenvolve o seu traballo de modo tradicional e empregando técnicas do oficio practicamente perdidas na actualidade. Traballou na restauración das forxas de gran número de edificios emblemáticos de Compostela: na Catedral, no Pazo de Raxoi, no Hostal dos Reis Católicos, nas fontes de Santiago, ou na Colexiata do Sar. Tamén participa en diferentes iniciativas docentes e de divulgación sectorial.
Pilar Aurora Otero Pérez, coñecida como Aurora de Freira, é cantareira e informante. Nacida en Grixoa e veciña de San Xoán de Fecha destaca como transmisora da música e das melodías populares, desenvolvendo un importante papel como informante en compilacións e recollidas de música tradicional. É unha das referentes compostelás aínda en activo na transmisión da poesía popular oral.
Xesús Manuel Coba Cascallar, coñecido como Suso do Dezaseis, é o hostaleiro que puxo en marcha a Casa de Xantar O’Dezaseis asentada no barrio de San Pedro e que, neste 2025, está de 30 aniversario. Como hostaleiro destaca por crear comunidade ao redor da cociña tradicional e de calidade, e por converter o seu restaurante en lugar de xuntanza cultural e social, conseguindo crear un espazo de referencia tanto para persoas visitantes como para a veciñanza.
