Adega organiza este sábado un curso de formación no río Sarela co obxectivo de aprender sobre os ecosistemas fluviais a través dos seus macroinvertebrados bioindicadores.
A Asociación Para a Defensa Ecolóxica de Galicia, ADEGA, organiza un novo curso de primavera que en este ano terá lugar en Compostela, no río Sarela, o vindeiro. Esta xornada de formación englóbase no denominado Proxecto Ríos e chega a súa corenta edición.
O curso esta dirixido a calquera persoa que teña interese en aprender sobre os ecosistemas fluviais e analizar a súa calidade ecolóxica a través da identificación dos macroinvertebrados presentes neles.
Este curso terá lugar o próximo sábado, 24 de maio, no local de ADEGA en Compostela e no río Sarela, en xornada de mañá, desde as 10:00 ata as 14:00 horas. O obxectivo desta formación é fornecer o voluntariado participante da metodoloxía de recollida e identificación de macroinvertebrados, animais bioindicadores que se empregan para determinar a calidade ecolóxica do río.
O punto de encontro será ás 10:00 horas no local de ADEGA (Avenida de Castelao, 20-baixo); e ás 11:00 sairase ao río Sarela para a recollida de mostras e o seu estudo. Ademais, haberá un pequeno descanso para refrixerio. Ás 14:00 daremos por finalizado o curso.
A xornada é gratuíta, mais cómpre inscribirse previamente a través deste formulario.
Proxecto Ríos
O Proxecto Ríos é unha iniciativa de educación e voluntariado ambiental promovida pola organización ecoloxista ADEGA e que neste ano 2025 celebra o seu 20 aniversario. A súa finalidade é dar a coñecer o importante papel dos cursos fluviais, amosar as súas problemáticas, así como fomentar iniciativas que permitan á cidadanía o mantemento e a mellora dos ríos mediante as ferramentas que garantan a súa participación. En concreto, esta xornada de formación conta co financiamento da Deputación da Coruña.
Pódese consultar máis información en Adega e no Proxecto Ríos
