Compostela, 13 de novembro do 2024 – “Compostela composta. Para a terra o que é da terra” é o nome que o concello de Santiago e ADEGA dan a un proxecto que definen como pioneiro no ámbito da compostaxe.
O proxecto estará activo a partir deste mes e ao longo do vindeiro ano en 10 centros de ensino, no CIFP Compostela e nalgunhas parroquias do rural Santiagués. O obxectivo é levar a compostaxe aos centros de ensino e ao agro mediante actuacións de sensibilización, concienciación e educación ambiental.
Por outra banda inténtase fomentar actitudes responsables no eido dos residuos e a participación activa da comunidade educativa no plan de tratamento dos residuos, desde a recollida selectiva e a separación en orixe ata o destino final.
Na presentación do proxecto participaron María Amigo, educadora ambiental de ADEGA; Xesús Domínguez, concelleiro de Medio Ambiente de Compostela; e Ramiro Esparís, director do CIFP Compostela.
A educadora ambiental de ADEGA debullou as accións do proxecto, que traballa a tres niveis (agrocompostaxe, ensino e hostalaría) e destacou o “papel chave da comunidade educativa” no camiño cara a unha xestión sustentable e eficiente dos residuos e as “múltiples posibilidades da compostaxe como ferramenta educativa e social”. “Queremos poñer a compostaxe no centro da solución á problemática dos residuos”, asegurou.
Pola súa banda, o concelleiro de Medio Ambiente, Xesús Domínguez, explicou que o goberno de Santiago ten “un firme compromiso cunha Compostela sustentable”, e que “aposta pola educación ambiental desde as persoas máis novas ata todos os estratos da poboación”.
Xesús Domínguez indicou que en Santiago están instalados dez composteiros, co que suma un máis con este colectivo no Centro de Hostaleira. Actualmente hai 1.500 composteiros individuais que dan servizo a unhas 5.000 persoas e dez illas de compostaxe comunitaria cunha medida de 20 familias usuarias.
O director do CIFP Compostela, Ramiro Esparís, mostrouse agradecido con ADEGA por contar co centro para este proxecto piloto que ser, asegurou, para concienciar a toda a comunidade educativa, e en especial, ao departamento de hostalaría e turismo, que son os que mais producen material compostable. “Comprometémonos a facer unha boa recollida destes residuos”.
Compostaxe comunitaria nos centros de ensino e no agro
Na primeira parte do proxecto todos os biorresiduos procedentes dos ciclos formativos de cociña, hostalaría e panadaría serán compostados in situ na área de compostaxe do centro. Será o propio alumnado quen se encargue de separar correctamente e botar os residuos nos composteiros. A xestión técnica correrá a cargo do mestre composteiro do Concello.
Doutra banda, o proxecto achegará tamén a compostaxe aos centros de ensino. A través de diferentes actividades de educación e divulgación ambiental dirixidas á comunidade educativa de primaria e secundaria, o obxectivo é conseguir que 10 centros educativos públicos do concello de Santiago de Compostela adopten de forma eficiente boas prácticas na xestión do lixo. As actividades a realizar van dende un proxecto de investigación sobre os residuos no centro ata a instalación dunha exposición gráfica sobre a compostaxe e dun composteiro educativo.
Xa por último, a terceira pata deste proxecto céntrase na compostaxe no rural. Trátase esta dunha acción de carácter experimental e baseada en adaptar unha experiencia de agrocompostaxe segundo as regulacións e necesidades das persoas agricultoras locais e grandes produtores. Deste xeito, preténdese ofrecer beneficios económicos directos, mellorar a sustentabilidade ambiental das operacións agrícolas e fortalecer a posición dos produtores no mercado ao aliñarse coas expectativas crecentes de sustentabilidade das persoas consumidoras e as regulacións ambientais.
