Compostela, 19 de outubro do 2022 – Compostela Aberta reclama que se actualicen os datos do Observatorio Municipal de Igualdade de Xénero da cidade.
A concelleira Marta Lois pediu que se realice un informe sobre a situación das mulleres vítimas da violencia machista en Santiago, “atendendo ás múltiples dimensións desta violencia, non só física, senón tamén psicolóxica, económica, obstétrica ou mesmo dixital”.
No vindeiro pleno municipal presentarán unha moción na que se insta ao goberno municipal a actualizar a información do Observatorio. Tamén demandará a posta en marcha de actividades municipais de apoio institucional ao 25 de novembro, Día Internacional da Eliminación da Violencia contra as Mulleres, así como que o Concello colabore co movemento feminista na organización e loxística dos actos do 25-N.
Marta Lois urxiu ao Goberno local a “atender os compromisos e as actuacións que ten pendentes en materia de Igualdade, e polos que Compostela Aberta vén preguntando reiteradamente desde o inicio do mandato”. A concelleira de CA insistiu en que “pouco sabemos do que se fixo ao longo deste mandato, e de como evolucionou a situación das mulleres de Santiago nestes últimos tres anos”.
Lois pediulle ao Goberno que elabore un informe “para transparentar información que consideramos moi relevante, como cantas mulleres foron atendidas pola concellería de Igualdade, cantas mulleres novas ou universitarias foron atendidas por mor dunha situación relacionada coas violencias machistas, cantas intervencións se realizaron nos puntos Lilas instalados nas festas, cales son os recursos de saída ou habitacionais dos que dispón o Concello para situacións de emerxencia por violencia de xénero, ou cantas veces se reuniu a Mesa Local de Coordinación Interinstitucional contra a violencia de xénero”.
A concelleira de Compostela Aberta reclamoulle ao Goberno que “adopte unha posición máis activa para facer de Santiago unha cidade libre de violencias machistas, con iniciativas que permitan identificar, visibilizar e concienciar á cidadanía sobre as súas diferentes formas, para que as mulleres vítimas non se sintan soas fronte a calquera tipo de agresión machista”. Nese sentido, defendeu a necesidade dunha campaña transversal impulsada desde a administración local “que piña ao dispor da cidadanía todos os recursos adecuados para avanzar cara unha sociedade plenamente igualitaria”.
